Miz ndaek vunz ndeu haenq gwn gik guh, 40 geij bi lo cungj aeu mbouj ndaej yah, baenz- ngoenz cungj dwg doeng bae sae dauq, ndaw mbanj ranz lawz miz gwn de cengdi daengz henz, caemhcaiq ndaek vunz de gig vaddaeuz.

Dangdieg miz aen gvenq ndeu, gwn laeuj mwhhaenx, aen congz he mboujguenj naengh geijlai vunz, cungj dwg doxlwnz ndenq gvaqbae, ciengzseiz dwg boux ndenq laeuj gaxgonq dauqfanj ndaej gwn laeuj ceiq laeng. Hoeng, ndenq daengz de gwn seiz, de hix mbouj ndenq roengzbae lo, gag gwn byaek noh hwnjdaeuj. Ndigah, gyoengqvunz youq baihlaeng de cungj mbouj ndaej gwn laeuj, hix mbouj ndei gangj okdaeuj, cijndei caj daengz lwnz daihngeih lo.

Miz ngoenz he, ndaw mbanj baihsae miz ranz he haeuj ranz moq cingjhek, de mbouj vaiq mbouj menh, vunzlai roengz naengh seiz de cij daengz, goq daengz aennaj, bouxcawj hix mbouj ndei gyaep de deuz, couh hawj de cab roengz congz he bae naengh. Baezneix, gyoengqvunz gaenq doxyaeng aeu cingj de baez ndeu. Ndigah, laeuj ndenq daengz boux mbiengjswix de gwn liux couh mbouj ndenq hawj de lo, boux mbiengjgvaz de yawj de mbouj haeujsim seiz gig vaiq couh iet fwngz bae aeu boi laeuj ndaw fwngz bouxvunz naengh youq mbiengjswix de, ndoet liux doq ndenq roengz boux laeng bae. De yawj daengxgyoengq cungj ndaej gwn laeuj, hainduj dawz dawh gwn byaek, cij de mbouj ndaej gwn, gip ndaej de heuh sing hung he:“Gou ne?” Hawj daengx congz vunz riuhumhum hwnjdaeuj.