Mbanjdaminj miz bouxvunz he heuhguh Daeghuk. Daeghuk youq ndaw ndang meh de ngamq 8 ndwen buenq couh okseiq lo. Daeghuk miz di ngawz, ndaw uk de siengj maz mbouj rox, caeuq caezgya cungj mbouj doxdoengz, baeznaengz lumj aen cifaiqgeu, baed couh cienqlulu, mbouj baed couh mbouj rox doengh lo.

Daeghuk 8 bi cij rox gangj vah, daengz 30 bi cij rox guh hong, ciengz miz vunz heuh de bae bang hong. Miz haujlai baez, Daeghuk youq ndaw mbanj bang vunz guh hong, yaek ndaej gwn haeux seiz, de lij guhcaeg baema ranz de gwn. Bouxcawj daeuj heuh de, de naeuz:“Mbouj bae, mbouj bae, ranz gou guh ndaej gvaq!”Nyex ndaej gyoengqvunz cungj riu hwnjdaeuj.

Daeghuk couhdwg baenzneix ngawz, hoeng miz saek seiz de hix gvai dangqmaz.

Miz bi he, meh Ahyinh baenz bingh yaek dai, de gig siengj raen naj Ahyinh mbat ndeu. Seizhaenx, Ahyinh youq ndaw singz guh hong dajcaep, boh de dwk denva heuh de dauq, de mbouj swt. Boh de baij beixnuengx bae heuh de dauq, de hix mbouj ma. Daeghuk rox le, naeuz:“Ngoenzcog sou dawz soujgih boh de daeuj, gou daj hawj de, de itdingh dauq.” Haetcaeux ngoenz daihngeih, Daeghuk dwk denva hawj Ahyinh, naeuz:“Haetneix boh mwngz youq ndaw suen vat ndaej gim, mwngz vaiq di dauq, saenq mbouj saenq youzcaih mwngz!” Ahyinh ciep ndaej denva, laihnaeuz dwg caen, laj- byonghngoenz couh dauq ranzmbanj. Daeghuk youq bakdou ranz de caj de, raen de couh naeuz:“Boh mwngz mbouj youq ndaw suen vat ndaej gim gvaq, gou yaeuh mwngz ndwi. Hoeng, aensim lwghauq couhdwg gim, bae yawj daxmeh mwngz ba, de ciengx mwngz hung mbouj yungzheih, seizneix baenz bingh naek mbouj rox ngoenzlawz dai, couh siengj caiq raen mwngz baez he.” Ahyinh najmong dangqmaz, haeuj ndaw rug bae yawj daxmeh de. Daxmeh de baez raen naj de, bingh sikhaek ndei dingz ndeu.

Miz mbat he, Daegngeih heuh Daeghuk bang gaj duz ma ndeu. Aeuq cug le, Daegngeih couh mbat youh mbat bae cingj Aubet daeuj gwn noh- ma. Aubet nyengh mbouj daeuj. Caezgya cungj rox, Aubet gig maij bang vunz guh saeh hoeng mbouj gouz ndaej maz hoizbauq, de hix bang Daegngeih caep gvaq cibgeij ngoenz laeuz moq, mbouj aeu faen cienz ndeu. Danghnaeuz de rox Daegngeih vih saeh neix cingj de gwn nohma, haengjdingh mbouj daeuj. Daeghuk doiq Daegngeih naeuz:“De mbouj rox gou gaj mbouj gaj ma, raeuz dawz laeuj noh bae ranz gou gwn. Gou bae cingj de, bauj de daeuj!” Caezgya cungj doengzeiq yienghneix guh.

Daeghuk bae doiq Aubet naeuz:“Aubet, mwngz ndaejhoengq lwi? Haxbaenh gou cawx ndaej go bah hung he dauq, bae bang gou ram haeuj ranz, baenz mbouj baenz?” “Dwgcaen? Seizlawz bae?”Aubet cam. “Seizneix couh bae, yaep ndeu gou lij miz saeh wnq yaek bae guh, mwngz bae couh rox caen mbouj caen.”

Aubet gaen Daeghuk bae daengz bakdou ranz Daeghuk, Daegngeih caeuq gyoengqvunz couh okdaeuj itheij rag de haeuj ndaw ranz bae. Daeghuk doiq Aubet naeuz:“Aubet, doiq mwngz mbouj gvaq lo, gou mbouj cawx ndaej bah, cijdwg heuh mwngz daeuj gwn nohma hane. Beixnuengx doengz gwn laeuj gig nauhyied, mwngz couh gaej deuz lo.” Caezgya dingq le, riuhoho hwnjdaeuj. Aubet hix mbouj ndei caiq doiswz. Miz daeg he naeuz:“Neix caen dwg ‘Bouxhuk niemh cien baez, cungj miz gienh saeh he guh ndaej deng’ bw! Baezneix yawj hwnjdaeuj, bouxhuk miz saek seiz beij bouxcoengmingz lij gvai bw.”