6 nyied 17 hauh, Sanhgyangh Dungcuz Swciyen Yangzhih Yangh banh ngux nyied cibsam minzsuz vwnzva hozdung nem ciet fwendah conzdungj, dangdieg vunzlai yungh minzsuz youzcunz、biujyienj gofoux、 doxdax fwendah daengj langhbaij vwnzva fwendah conzdungj cezmuz ndeiyawj lai cungj lai yiengh, yinx ndaej geij fanh boux beixnuengx gak cuz Gveicouh Guengjsae daeuj yawjngonz daejniemh.

Fwendah Dungcuz, youh heuh diuqhenzdah Dungcuz, cujyau hwng youq Gveicouh Lizbingz、 Cungzgyangh caeuq Guengjsae Sanhgyangh、 Yungzsuij daengj yienh Mbanjdung henzdah rangh Dahduhliujgyangh nem dahnga de, dwg cungjloih “go iq” Dungcuz mbouj yungh buenxciengq ndawde cungj godiuq he, dwg cungj godiuq saumbauq Dungcuz youq guh hong seizhoengq, eu fwen naenghhwnz、 ra youx gyau youx caeuq bouxlaux son vunz guh ndei seiz ciengq he.

(Vuz Lenyinh/吴练勋 Gungh Bujgangh/龚普康)