6 nyied 16 hauh, Lungzswng Gak Cuz Swciyen Laujgangiz lienzhab fwen hezvei aen yienh neix banh aen cawjdaez dwg “vih saehnieb dangj demgya naengzliengh ndei” fwen doxdax. 24 boux canghfwen daj daengx yienh Myauz、 Yauz、 Dung、 Cuengh、 Gun 5 aen minzcuz daeuj haenx, yungh fwen gyau youx, humxheux “song hag it guh” hagsib gyauyuz、 cingcinj bangrex、 seveicujyi hwzsinh gvacizgvanh nem swnghdai lajmbanj hwnjguh daengj cawjdaez doiq fwen, ciengqyiengj fatyiengz hot fwen naengzliengh ndei seveicujyi, caux ok heiqfaenh ndawbiengz ndei.

Gaenh geij bi neix daeuj, aen yienh neix doenggvaq bangcoengh laebbaenz ndawbiengz fwen hezvei、 vatcimh caeuq gungganq bouxswnjcienz fwen daengj fuengsik, swnjcienz caeuq hwngfat minzcuz fwen vwnzva, fwen gaenq baenz le cungj fuengsik dangdieg senhconz fuengcim cwngcwz dangj caeuq fungfouq vwnzva saedceij vunzlai he.

(Banh Cisiengz/潘志祥 Vuz Haij- vaz/吴海华)