1. Dingjlingz doxbungz

Goenglungz:

Gou yienznaeuz sing hep,

Hix aeu ngap geij gawq,

Baihnaj yah naj myaex,

Dwg mbouj dwg Liuzsaez?

Liuzsaez:

Baihlaeng boux daeggo,

Gangj vah caen raemhraex,

Caeux rox gou naj myaex,

Dongx Liuzsaez guh maz.

Goenglungz:

Liuzsaez mwngz gaej heiq,

Mbouj dwg mwngz naj myaex,

Dwg raemhfaex dangj deng,

Naj mwngz lumj ngveihgva,

Riu daeuj lumj gviqfeih,

Da mwngz luenzndumndum,

Lumj baenz aen dendungz,

Rongh doh ndoeng gocoengz.

Fwngz mwngz lumj ngaenz hau,

Oiq gvaq naeng go’gyau,

Byoemgyaeuj lumj cat youz,

Rwi douh hix ranjdeuz,

Mengq lumj aen gaeuyiengz,

Ga lumj ga roegdiuq,

Hwet lumj hwet duzdoq，

Fouq heuj caezcupcup,

Bouxboux cungj siengj cup.

Liuzsaez:

Lau go lumj nyaenma,

De riu geiqmaeuz daeuj,

Ngoenzneix gyaj bak ndei,

Siengj yaeuh nuengx guh maz?

Goenglungz:

Nuengx daenj mauh naengma,

Ngoenzneix mwngz bae lawz?

Nuengx daenj gouh haiz baengz,

Daeuj ndawlueg guh maz?

Liuzsaez:

Daeuj ranzlwg gwnsix,

Lienz raemx cex bae ma,

Ra baengzndongq daeuj daemq,

Cawx goromj ma ranz.

Daiq ga gaeq hawj lan,

Can daihngeih miz nyaemj.

Mwngz miz roet couh ok,

Gaej cungj dok gumq cwz.

Goenglungz:

Daengngoenz gwnzmbwn venj gig sang,

Couh lumj naj nuengx hoengzmaeq-

maeq,

Ranz gou miz aen gingq gyangqlangh,

Cingj mwngz caeuq gou bae ranz ciuq.

Liuzsaez:

Yenzlaiz daeggo mbouj miz saeh,

Ganjdaeuj ndawlueg loengh dahnuengx,

Siujsim dahnuengx lwnh hawj sauj,

Ngoenzngoenz cauj mwngz lumj cien

gyaeq.

Goenglungz:

Dahnuengx yenzlaiz mwngz mbouj rox,

Sauj mwngz caeux caeux youq denh-

goz,

Mbonq go buenqmbiengj maj ngawh-

rin,

Daihsauj gwnzmbwn yaek miz hoenz,

Raen mwngz ngoenzneix caeuq gou

ndei,

Dingh vaq bouxsien bang yinx sienq,

Naq hoengz nyingz sim mbouj hawj liz.

Liuzsaez:

Gawqyienz go rox nuengx lauxsaed,

Gangj vah engqgya aeu nyinhcaen,

Mwngz rox ngoenzneix aen seiqgyaiq,

Bakdou yahmaiq saenzsied lai,

Siujsim bouxboux dawz mwngz ceij,

Yienlienz nuengx gwn godaejgoenq.

Goenglungz:

Aeu gangj geij mbat mwngz cij saenq,

Daihsauj gvaqseiq 20 bi,

Aenvih ndawsim lau vunz ceij,

Gou gyaeng swhgeij youq ndaw ranz,

Vunz hemq doxcim mbouj bae gvaq,

Vunz naeuz yaek haq mbouj gamj aeu.

（caengz sat）