Mboengqneix, Gvangjsih Minzcuz Dayoz Yisuz Yozyen 30 lai boux hagseng bae daengz Yungzsuij Myauzcuz Swciyen Dungdouz Cin Mbanjginzbeih soucomz Fwenmyauz. Canghfwen Mbanjginzbeih doenggvaq yienjciengq Fwendigmyauz、 fwenbakdog、 fwendoiqbak daengj cungjgo, youq doxgyau seiz langhbaij fwenlanzloh、 fwengingqlaeuj, hawj gyoengq hagseng caijfunghdonz roxyiuj Fwenmyauz mizyinx.

Ciuq cam rox, aen caijfunghdonz neix dwg baez daih’it cienmonz bae Yungzsuij Mbanjmyauz soucomz Fwenmyauz. Muzdiz dwg doenggvaq saeddieg cazyawj、 soucomz yenzswnghdai Fwenmyauz, aeu ndaej haiguh cauxsij caeuq yenzgiu yaemgo Myauzcuz, swnjcienz feihvuzciz vwnzva yizcanj.

(Siz Gveiz/石 奎)