(Simj fwngz vix najbyak Au)

Denz: (Raen Simj doengh fwngz rag Simj deuz) Beixsauj, gaej doengh fwngz.

Hozgaek hoj guh saeh,

Siu heiq cij heih baenz,

Menhmenh cam goekgaen,

Raemx mboek raen rin loh.

Simj:

Haetlwenz haeux ngamq cug,

De duk bae yihyen,

Bae laeglemx vayen,

Henre gou dwk doeg.

Yied naemj couh yied heiq,

Rox de ngeix gijmaz,

Gij cingzngeih gvanbaz,

Yawj dangq haz dangq nywj.

Denz: (coh Au)

Roegga mbouj luenh ya,

Gvanbaz gaej doxngeiz,

Dauhleix mwngz rox caez,

Yawz lij ngeiz beixsauj?

Au: Gou……gou……aeya， gou

gangj mbouj cingcuj.

Simj:

Vangraeh cungj dwgcaengz,

Hixnaengz biengj caekhaex,

De baenzbag yienghneix,

Lij ngeix vunz haih de.

Boh gou ndaej yw ma,

Camhseiz ha ndaej bingh,

De cix euqgingging,

Itdingh naeuz mbouj gwn.

Denz:

Daegbeix mbouj dwg bag,

Dwg sou gag ngeix loeng,

De beizsingq mbouj doengz,

Sou doeng ngeix sae siengj.

Au：

Gou gangj couh mbouj saenq,

Mbouj bingh gwn maz yw,

Ndaq haeuj gyaeuj haeuj rwz,

Gwn yw cij mazmwnh.

……

Denz: O! Laxlawz mwngz dwg lau de——

Au：

De ep gou gwn yw,

Lij lw miz song guenq,

Lau de saj soujduenh,

Cuengq ndaw ngaiz hawj gwn.

Denz: Sou song boux ha.

Miz saeh mbouj doxcam,

Gag boux ram gwnzmbaq,

Daengq sou song gyaeujyah,

Doxyaeng gvaq baezlaeng.

Simj:

Miz maz ndei doxyaeng,

Boux daengz boux daeuj ndaq,

Sing rongx de caengz gvaq,

Yahmeh de youh naeuz.

Denz: Yahmeh de hix naeuz mwngz?

Simj:

Buzlaux ndaq yaek dai,

Laih gou gvai doxok,

Gen fwngz niuj baihrog,

Lod cienz bae hawj vunz.

Denz: Lod cienz bae hawj vunz? Ndaw sou lij miz bouxwnq dem?

Au: Miz! Daegbeu.

Denz: Aeyu, cingqcaen miz boux ndeu dem ha!

Simj:

Gou baez daih’it haq,

Miz gvaq daeglwg ndeu,

Coh heuhguh Daegbeu,

Meh deuz lwg riengz daeuj.

(caengz sat)