Dangqnaj, Namzningz Si haenq- rengz haiguh bonjdieg daegsaek sifan hwnjguh, doidoengh hwnjguh buek bonjdieg daegsaek hwnjguh sifan yienh、 sifan gih、 sifan mbanj funggek mbouj doxdoengz ndeu.

Namzningz Si bonjdieg daegsaek sifan hwnjguh ciuq gij fuengsik “diemj、 sienq、 mienh” giethab doicaenh, youq gwnz “diemj” dajcaux cingbinj, sifan daiqdoengh; youq gwnz “sienq” dungjcouz maeuzsuenq, doed ok doiq “swnghdai lajmbanj”gizdieg cungdenj nangqdaengz yanghcin caeuq henzsienq gvaengxlaengx mbanj nem aenmbanj gaeuqgeq、 mbanj daegsaek okmingz、 minzsuz ranzyouq sifan mbanj daengj aenmbanj caebcomz doicaenh; youq gwnz “mienh” haenq- rengz doigvangq, diuhdoengh deihfueng damqra doicaenh gij gaenxmaenx- singq bonjdieg daegsaek hwnjguh, daezsang lajmbanj hwnjguh cingjdaej suijbingz.

Bi 2016 sawqdiemj damqra hwnjguh 13 aen si gaep bonjdieg daegsaek sifan mbanj, youq bi 2017 gaxgonq saedyienh gij muzbyauh cauxlaeb 2 aen swcigih bonjdieg daegsaek sifan yienh、 15 aen sifan mbanj. Aeu henz loh gaudiet、 henz goengloh、 henz haij henz dah、 lijyouz gingjgih、 giz gapgyaiq singz yangh、 mbanj hung cin hung daengj dieg guh cungdenj, gaem ndei hong gaijndei yienghsiengq mbanj sifan caeuq gwnz “mienh” daezsang, cauxlaeb haujlai aen dieg lienz sienq baenz benq bonjdieg daegsaek mbanj, baujhoh aenmbanj gaeuqgeq, swnjcienz lizsij goekdaej, yienh’ok minzcuz daegsaek, cuengqok gij feihdauh bonjdieg. Gaem ndei hong 15 aen si gaep minzsuz ranzyouq sifan mbanj bi 2015 gaenq cauxlaeb haenx laebdaeb guh caeuq guhcaez daezsang, doicaenh bi 2016 caux moq 16 aen si gaep cunhsijsiz caeuq 12 aen si gaep minzsuz ranzyouq sifan mbanj hanghmoeg hwnjguh.

(Veiz Yenzfuz/韦元福)