De dwg doengzhag gou, bineix cibngeih bi, dwg boux dahsau iq ndeu. De byoem dinj ndaemndwt, song ceh da youh hung youh rongh, song diuz bwnda gungjgetget. Youq ndaw ban, de dwg hagsib veijyenz, hagsib cingzcik gig ndei. Youq gwnz mingzdan gak cungj doxdax ndaej ciengj gwnzde, cungj ra ndaej raen aencoh de.

De guh gijmaz cungj gig ciensim, de daegbied gyaez goq meijsuz, moix baez hwnj goq meijsuz, de cungj angq raixcaix, moix baez de guh gij cozbinj haenx cungj beij dou guh ndaej ndei. Geiq ndaej miz baez ndeu, hwnj goq meijsuz, dou cingq guh cozbinj, sawqmwh, bakdou gyausiz yiengj lo, yenzlaiz dwg banhcujyin Lij lauxsae haeujdaeuj. “Hagsib veijyenz, cingj mwngz daeuj ndaw bangunghsiz mbat ndeu, bang lauxsae guh di saeh!”Hoeng, de cingq ciensim guh cozbinj, mbouj dingqnyi lauxsae heuh. Gou doiq de naeuz:“Vei, Lij lauxsae heuh mwngz ha!”De cij singj gvaqdaeuj.

De lij dwg boux doengzhag gig miz simgyaez ndeu. Miz baez ndeu, dou vih gyoengq lwgnyez gungzhoj ndaw diegbya gien ngaenz, gij doengzhag wnq cungj dwg gien 5 maenz 10 maenz, de gingqyienz gien le 100 maenz! Dou cam de:“Mwngz vih gijmaz gien baenzneix lai? Eiqsei eiqsei mbouj ndaej luma? Gyoengqde youh mbouj dwg vunzcaen mwngz!”Siengj mbouj daengz de gingqyienz aeng raemxda doiq dou gangj:“Gyoengqde yienznaeuz mbouj dwg vunzcaen gou, hoeng gyoengqde caeuq raeuz cungj dwg lwgnyez, gyoengqde hix yaek doegsaw, hix aeu hag cihsiz, hix yaek lumj raeuz ityiengh miz aen ranz ndaej dangj rumz dangj fwn he ha!”Dou dingq le, cungj ngaem gyaeuj roengzdaeuj, naj hoengz lo.

Mboujgvaq, de hix miz giet- diemj, lumj dwg lujlaj. Miz baez ndeu dou guh yijvwnz lienhguh, miz diuz daezmoeg ndeu: Cingj mwngz youq ndaw faenzcieng ra ok coenz nijyinz caeuq coenz beijlumj, coenz nijyinz yungh“~~~~~”veh okdaeuj, coenz beijlumj yungh “———”veh ok- daeuj. Daezmoeg gaenq gangj ndaej gig cingcuj, hoeng de vanzlij dwg aeu sienq van bae veh coenz beijlumj, aeu sienqsoh veh coenz nijyinz.

Daihgya itdingh gig siengj rox boux doengzhag neix dwg byawz, gizsaed, de couhdwg Lingzsw Siujyoz roek nienzgaep it ban Cangh Danlingz.

(指导老师：陆雪燕)