Daxmeh, gou miz haujlai vah siengj doiq mwngz gangj, hoeng vah baez daengz henz bak youh mbouj rox gangj gijmaz ndei, seizneix gou couh ciq baez gihvei sij cozvwnz neix, dawz gij vah ndawsim gou lwnh mwngz nyi.

Mwngz lij geiq ndaej lwi? Miz baez ndeu gaujsi gou gauj ndaej mbouj ndei, gou gig nanzgvaq, dang gou dawz sigienj hawj mwngz yawj seiz, mwngz mboujdanh mbouj bihbingz gou, vanzlij gujlij gou naeuz:“Saetbaih ndaej roxhit, saetbaih baez ndeu mbouj youqgaenj, youqgaenj dwg rox daj ndaw saetbaih bae ra yenzyinh, mbouj doeknaiq, miz saenqsim bae haekfug gunnanz, daxmeh siengsaenq mwngz baezlaeng itdingh gauj ndaej ndei.” Daxmeh, gij vah mwngz couh lumj rumzcin ci haeuj ndawsim gou, sawj gou caiq baez miz saenqsim, daxmeh, cingj mwngz cuengqsim, baezlaeng gou itdingh mbouj hawj mwngz saetmuengh!

Daxmeh, mwh mbwn nit, mwngz cungj dwg hawj gou daenj ndaej raeujrubrub, cij cuengqsim hawj gou bae hagdangz, hoeng mwngz cungj dwg daenj gij buh mbangmbi’mbi bae guhhong, lienz doiq madfwngz hix sij mbouj ndaej cawx, song fwngz mwngz cungj deng gyaengj hoengz lo, hoeng mwngz coengzlaiz cungj mbouj gyangz saek sing. Daxmeh mwngz yienghneix mbaet gwn mbaet yungh, gou rox mwngz dwg vihliux gung gou doegsaw, hawj gou gwn ndaej ndei daenj ndaej raeuj, hoeng mwngz hix aeu insik ndangdaej swhgeij ha!

Daxmeh, moix baez gou siengj bang mwngz guh di hong seiz, mwngz cungj dwg gangj gou lij iq, mbouj hawj gou guh, gou rox mwngz yienghneix guh dwg gvansim gou, lau gou baeg, hoeng gou gaenq ngoenz beij ngoenz majhung lo, miz di saehcingz gou gaenq rox guh lo, mwngz couh gaej yousim baenz lai lo.

Daxmeh, gou siengj doiq mwngz gangj, mwngz sinhoj lo, mwngz couh yietnaiq yietnaiq ba!

（指导老师： 郑振常）