Miz boux mehbaj ndeu cungj naeuz mehsimj ranz doiqnaj de gig gik, naeuz de saeg buhvaq coengzlaiz saeg mbouj seuq gvaq, dak youq gyanghongh lij raen miz diemj uq. Boux mehbaj neix caen siengj mbouj doeng de baenzlawz lienz saeg buhvaq cungj saeg baenz yienghneix.

Itcig daengz ngoenz he, miz boux baengzyoux boux mehbaj neix daengz ranz de guh hek, dingq boux mehbaj neix cungj gangj, couh byaij gyawj aen cueng bae yawj, baezneix cij rox: Yenzlaiz mbouj dwg meh- simj ranz doiqnaj saeg buhvaq mbouj seuq. Boux baengzyoux neix dawz gaiq baengzuet he bae mad aen cueng ranz boux mehbaj neix seuq cingh, doeklaeng doiq boux mehbaj neix naeuz:“Baezneix mwngz daeuj yawjyawj, mehsimj ranz doiqnaj mwngz saeg buhvaq seuq mbouj seuq?”

Boux mehbaj neix daengz seizneix cij rox, yenzlaiz dwg aen cueng ranz swhgeij caeux couh naeh lo, caemhcaiq swhgeij youh nanz mbouj uet. Doenggvaq aen cueng naeh he yawj maz cungj dwg mbouj seuq.

Bouxvunz cungj dwg maij aeu cwzyin swhgeij suenq daengz ndang bouxwnq bae, cungj dwg yawjraen loengcawq caeuq gezdenj bouxwnq, hoeng cungj mbouj nyienh bae siengjsiengj dwg mbouj dwg swhgeij guh mbouj deng.