Gaxgonq, miz duz meuzmeh he caeuq duz meuzlwg ndeu. Meuzlwg youq lij iq seiz, meuzmeh siengj son de hag gij bonjsaeh coemj nou, hoeng meuzlwg naeuz:“Gou lij iq, gvaq geij ngoenz caiq hag.” Youq moix baez daxmeh de siengj son de gij bonjsaeh neix seiz, de cungj mbenjnye’nye dwk gangj:“Mbouj ma, mbouj ma, caj gou maj hung di, hag gij bonjsaeh neix seiz cij hag ndaej engq ndei.” Couh yienghneix ngoenz youh gvaq ngoenz, de cungj mbouj caengz bae hag gij bonjsaeh neix.

Ngoenz he, duz meuzmeh okbae guhcaemz. Gyoengq noulaux raen cij miz duz meuzlwg he youq ranz, couh buet okdaeuj bin hwnj bin roengz, raen duz meuzlwg neix cijdwg guthwet, hix mbouj daeuj coemj gyoengqde. Gyoengq noulaux couh menhmenh depgyawj de, humx de hwnjdaeuj, meuzlwg lau ndaej gij mumh cungj daengj lo, aenvih de mbouj rox gij bonjsaeh coemj nou saek di. Hoeng de naemj daengz: Duznou seng daeuj couh lau duzmeuz. Naemj daengz gizneix, de couh yaengxyaengx aen nyauj de, cang guh gij yienghceij gig ak. De yungh caenh gij rengz daengx ndang coh duznou laux he coemj gvaqbae. Siengj mbouj daengz duz nou haenx gig gvai, sikhaek buet deuz lo. Duz meuzlwg neix coemj mbouj deng, ca didi lij yaek bungq doek gij heujnaj de dem.

Meuzlwg coemj mbouj ndaej duz noulaux haenx, cienq ndang couh siengj lizhai. Hoeng miz duz nou he gaenq haebmaenh diuz rieng de lo, duz meuzlwg neix bae mbouj ndaej, cienq bae cienq dauq youh coemj mbouj daengz duz nou haeb rieng de. Gyoengq nou raen le, doengzcaez buet gvaq daengz henz ndang duz meuzlwg neix, mizmbangj naenx meuzlwg youq gwnz namh, mizmbangj yungh nyauj ngap, mizmbangj yungh bak haeb, in ndaej de laezheu swdswd.

Cingq youq seizneix, duz meuzmeh ma daengz rog ranz, dingqnyi gij sing meuzlwg, couh dacaengz hat sing hung ndeu, caemhcaiq cung haeuj ndaw ranz bae. Gyoengq nou deng de hwk ndaej baeb rieng goemq gyaeuj dauqcawq luenh buet.

Duz meuzlwg neix baez raen daengz meuzmeh, couh ndwn hwnj buet haeuj ndaw rungj daxmeh de bae, sim’in dwk daej hwnjdaeuj. Daxmeh caj de dingz le, couh naeuz de:“Gaxgonq heuh mwngz hag gij bonjsaeh coemj nou, mwngz gik hag, ngoenzneix mwngz rox vihmaz caengz? Danghnaeuz mwngz mbouj miz saek di caen bonjsaeh, Duznou mbouj rox ciengxlwenx lau mwngz!” Duz meuzlwg najmong dwk dap:“Daxmeh a, daj seizneix hwnj, gou itdingh nyinhcaen hag gij bonjsaeh coemj nou, caiqlij hag ndaej ndei, mbouj caiq hawj gyoengq nou daeuj hangz gou!”