Mbwk: Daengngoenz yaek doek congh

Ranzrongh mbouj ndaej nanz

Raeuz yaek aeu faensanq

Simfanz doengz raemx goenj

Sai: Daengngoenz yaek doek byai

Lij rox byaij doxdauq

Hawj raeuz mbouj raen laux

Ndaej lauh geij bi dem

Mbwk: Daengngoenz yaek doek byai

Song gaiq ga gaeuzngauq

Daengz mbwn laep doxdauq

Iu doengzsauh baema

Sai: Daengngoenz doek baihsae

Aeu mae rag hwnjma

Raeuz mbouj gaenj baema

Guhfwen gvaq gyanghwnz

Mbwk: Daengngoenz doek roengz bya

Mbouj caiq ma doxdauq

Rin doek roengz haijlaux

Guhlawz dauq ndaej fouz

Sai: Daengngoenz doek roengzbae

Aeu mae rag doxdauq

Rin doek roengz haijlaux

Aeu muengx lauz hwnjma

Mbwk: Rin doek haij dauq fouz

Raeuz hix yaek faensanq

Baema guh hongranz

Muh haeuxyangz cawj haeux

Sai: Ciuq mwngz gangj yienghneix

Ndawsim gou gig fanz

Raeuz bieksanq ma ranz

Couh nanz caiq raennaj

Mbwk: Seiz raeuz faenbied daengz

Gag vunz ma ranz vunz

Beix biek nuengx couh lumz

Nuengx biek beix lij geiq

Sai: Nuengx biek beix baema

Couh lumj bya biek sae

Bya riengz raemx bae gyae

Vit sae youq ndaw reih

Mbwk: Beix biek nuengx baema

Couh lumj va biek nye

Va riengz rumz bae gyae

Ndek ndaeknye gyuhget

Sai: Nuengx biek beix baema

Couh lumj va biek ngeiq

Ngeiq hai va lij vei

Va doek namh doq dai

Mbwk: Raemhbya roengzvangvang

Raeuz faensanq seizneix

Nangz youq ranz caj beix

Cij lw nuengx vunz dog

Sai: Nuengx biek beix ma ranz

Lij miz gvan buenx mwngz

Beix boux vunz ndeu ninz

Fangzhwnz ndiu youh daej

Mbwk: Nouranz naeuz nounaz

Daihgya cungj dwg nou

Song max caez fouz loengz

Langh ndawdoengh guh’angq

Sai: Max fouz loengz langhcuengq

Muengh caemh riengh caemh loengz

Seizneix camh lizfaen

Mbatlaeng mbouj caiq sanq

Mbwk: Mbatlaeng mbouj caiq sanq

Caez caemh riengh caemh ranz

Bi moq sam nyied sam

Beixnuengx caiq doxraen

Sai: Bi moq sam nyied sam

Song ranz miz daihleih

Muengh nuengx sim aeu geiq

Dauq gizneix guhfwen

Mbwk: Gwnz nga miz roeg ciuz

Naeuz beix cingj cuengqsim

Ndawdungx nuengx miz gim

Seizseiz geiq ndaw hoz