Moix boux vunz cungj miz lijsiengj, gou hix miz. Lijsiengj dwg aendaeng, ciuq rongh diuzloh seiqvunz raeuz, mbouj miz lijsiengj, seiqvunz raeuz couh laepngaungau. Lijsiengj gou couhdwg guh boux lauxsae ndeu.

Mwngz aiq cam gou: Sam bak roekcib hangz, vihmaz aeu genj dang lauxsae ne? Aenvih youq gwnz loh majhung raeuz, dwg lauxsae son hawj raeuz cihsiz, son raeuz dauhleix guh vunz.

Moix ngoenz hwnjdangz, lauxsae cungj son hawj raeuz gohyoz cihsiz, lwnh raeuz dauhleix guh vunz. Miz di hagseng mbouj dingqvah, ciengz nyauxluenh, caemhcaiq haemz lauxsae. Hoeng, lauxsae cix gig miz naihsim, menhmenh aeu dauhleix daeuj sonyinx hagseng.

Cuengqhag le, lauxsae lij caengz ndaej ma ranz, de lij vih raeuz gaij cozyez; gyanghaemh raeuz cungj ninzndaek lo, fuengz lauxsae daeng lij rongh, dwg lauxsae cingq vih ngoenzlaeng hwnjdangz beigo. Lauxsae vih guekgya son’gyauq vunz miz caiz mbouj lau sinhoj cungj cingsaenz neix, sawj gou gig boiqfug, gig gingqcungh. Couh sawj gou miz majhung le dang lauxsae cungj lijsiengj neix.

Lijsiengj gou dwg yienghneix, lijsiengj mwngz dwg gijmaz ne ?

（指导老师：邓福生）