Youq ndaw ngoenznaengz gwn- daenj, miz haujlai haujlai saeh sawj gou gamjdoengh, hoeng, sawj gou ceiq gamjdoengh haenx dwg miz baez fong haiz ndeu.

Haenx dwg seizdoeng aen ban- haemh ndeu, gaenq haj diemj buenq lo, rumzbaek cihuhu, dawz gij nywjroz mbawloenq gwnz dieg gienj hwnj gwnz mbwn bae, geuj geij geuj youh doek roengzdaeuj. Gyoengqvunz yungh buhmienz suk aenndang ndaetfwdfad, gipgip muengzmuengz ganj ma ranz.

Gou aemq aen daehsaw, daenj gouh haizmienz baihnaj byoengq congh haenx baez yamq baez yamq byaij baema. Gouh haiz byoengq congh sawj gou gamjdaengz engq nit lo, danghnaeuz ndaej fong congh- byoengq hwnjdaeuj, couh ndei lo! Seizhaenx, gou yawjraen baihnaj liz gou mbouj gyae haenx, miz boux bouxlaux ndeu cingq yaek rap aensieng fong haiz baema. Gou ganjgip hemq sing ndeu, youh dingz youq lo, sim siengj: Suenq lo, mbwn yaek laep lo, ngoenzcog caiq fong ba. Hoeng bouxlaux cix mbouj haengj lo, hemq gou:“Dahniq, fong haiz ha?”

“Mbwn yaek laep lo, mbouj fong lo.”“Mbouj youqgaenj, gou lij yawj ndaej raen, vaiq di dawz haiz duet okdaeuj ba.”Gou naemj dwg mbouj dwg de daiq dam cienz lo, gou gaenq gangj mbouj fong lo, hoeng mbouj- guenj gou baenzlawz doi, de cungj dwg gangj mbouj youqgaenj, gou doi mbouj gvaqbae, cijndei hawj de fong lo.

Gou sijsaeq yawj boux bouxlaux fong haiz neix, byoem hau, naj henjndaem, doiq da hoemz, najbyak miz geij diuz nyaeuq gig yienh. Aiq dwg ciengzgeiz fong haiz, fajfwngz miz daw, sam lwgfwngz cungqgyang nem miz gyauhbu. De aeu song ga geb haiz maenh, fwngz gvaz gaem cim yungh rengz mbongq daejhaiz，fwngz swix beng sienq gvaqdaeuj, baenz cim baenz cim sijsaeq fong. Aenvih mbwn daiq nit lo, de seiz mbouj seiz yungh bak ha fwngz de. Giz byoengq fong ndei le, de cix mbouj dingz fwngz, youh gya fong baez ndeu, itmienh fong itmienh naeuz:“Sou lwgnyez daenj haiz, haiz mbouj gietsaed mbouj ndaej ha!”

Haiz fong ndei lo, gou daj ndaw daeh mbon cienz, hong lumh caez daehbuh daehvaq, cix ra mbouj ok faen cienz ndeu, mbouj rox cienz seiz lawz deng doek lo, gou gip lo, mbouj rox baenzlawz guh.

Bouxlaux fong haiz raen gou baenzneix diuqgah, riu lo, naeuz:“Suenq lo, mbouj yungh ra lo.”Gou mbouj rox baenzlawz guh ndei, gvaq yaep he cij siengj hwnj docih bouxlaux, naeuz:“Daxgoeng, docih lo! Mwngz baenzneix laux lo, vihmaz lij okdaeuj fong haiz, mbouj youq ranz yiengjfuk ne?” “Youq hix beg youq, mboujyawx okdaeuj fongfong haiz, hawj vunz daiq daeuj fuengbienh.” Bouxlaux riu dwk naeuz. Dingq bouxlaux baenzneix gangj, gou gig gamjdoengh.

Gou daenj ndei haiz byaij baema, byaij geij yamq ngeux gyaeuj yawj bouxlaux sousib siengfonghaiz, sawq- mwh raq raeujrub he daj laj din cienz daengz daengx ndang, gou di ndeu cungj mbouj roxnyinh nit lo.

(指导老师：冼娟凤)