Boux nungzminz ndeu, cij ndaej doeg 2 bi cuhcungh, ranz de couh mbouj miz ngaenz hawj de laebdaeb doeg roengzbae lo. De dauq ranz bang boh de ndaem 3 moux naz. De ndaej 19 bi seiz, boh de dai bae, diuzrap ciengx ranz naekcaem couh cungj dimz youq gwnz mbaq de lo. De aeu ciuqgoq daxmeh ndang mbouj ndei, lij yaek goqhoh daxbuz gyad youq gwnz congz.

Betcib nienzdaih, nazreih ndaej hawj aen ranz bau guh. De vat gaiq gumz ndeu baenz aen daemz he, siengj aeu daeuj ciengx bya. Hoeng, ganbu ndaw yangh lwnh hawj de, nazraemx mbouj ndaej aeu daeuj ciengx bya, cij ndaej ndaem vamiuz, de cijndei aeu namh dienz aen daemz hwnjdaeuj. Gienh saeh neix bienq- baenz aen gangjriu he, youq ndaw da bouxwnq, de dwg boux vunz siengj fatcaiz hoeng gig huk he.

Ndaejnyi ciengx gaeq ndaej ngaenz, de cam caencik ciq 500 maenz ngaenz bae ciengx gaeq. Hoeng, baez raemxrongz he gvaq, gyoengqgaeq de ciengx cungj ndaej bingh, geij ngoenz couh dai caez. Boiz 500 maenz ngaenz doiq bouxwnq daeuj gangj gojnwngz mbouj dwg maz saeh hung, doiq aen ranz cij deq 3 moux naz daeuj gangj couhdwg aen soq hungloet lo. Daxmeh de souh mbouj ndaej aen dajgik neix, gingqyienz youheiq lai dai bae lo.

Doeklaeng de lij oemq laeuj、dwk bya, vanzlij youq henz dat bang vunz dwk congh coq ywbauq…… Hoeng, cungj mbouj guh ndaej geijlai ngaenz. De ndaej 35 bi seiz, lij caengz miz yah. Couhcinj mehmbwk lizvaen caemhcaiq miz lwg hix yawj mbouj hwnj de. Aenvih de cijmiz aen ranz- namh he, seizlawz doemq roengzdaeuj mbouj rox.

Hoeng, de lij siengj buek baez ndeu, couh gizgiz bae ciq ngaenz cawx gyaq dohlahgih soujfuz he. Byawz rox, hai hwnj roen mbouj daengz buenq ndwen, de caeuq gyaq dohlahgih neix itheij cung haeuj ndaw dah bae. Cik ga he goenq lo, de bienqbaenz boux vunzvej. Gyaq dohlahgih de ndaej lauz hwnjdaeuj seiz, gaenq vaihluk vaihlik lo. De cij ndaej lid gyaq ci neix bae, dangq diet feiq bae gai, vuenh ndaej di ngaenz dauq. Caezgya ca mbouj lai cungj naeuz ciuhvunz de mbouj baenz lo.

Hoeng, doeklaeng de baenz boux lauxcungj aen gunghswh ndeu, swhcanj miz 2 ik lai maenz. Seizneix, haujlai vunz cungj rox de gaxgonq gig gungzhoj caeuq ginglig gig cienzgeiz. Gyoengq meizdij bae caijfangj de, haujlai gicej sij faenzcieng gangj gojsaeh de. Hoeng, gou cij geiq ndaej aen cingzciet neix——

Boux gicej he cam de:“Youq ndaw ndwenngoenz gungzhoj, mwngz baengh maz baez doek baez mbouj ndupdauq?”

De naengh youq laeng daiz banhgoeng youh gvangq youh ndei, gwn boi raemx ndaw fwngz de liux bae. Doeklaeng, de gaem aen boi haenx maenh, dauqfanj cam boux gicej:“Danghnaeuz gou cuengq fwngz, aen boi neix rox baenzlawz?”

Boux gicej neix naeuz:“Doek roengz gwnz namh, dek lo.”

“Dou sawq baez he.” De naeuz.

Fwngz de baez soeng, aen boi haenx doek youq gwnz namh caemhcaiq lij fatok sing seksak ndeu, hoeng, caengz deksoiq, caeuq doek roengzdaeuj gaxgonq doxdoengz. De naeuz:“Couhcinj gou cam 10 boux vunz, gyoengqde hix itdingh nyinh- naeuz aen boi neix rox deksoiq. Hoeng, aen boi neix mbouj dwg aen boi bujdungh, de dwg aen boibohliz gang he.”

Yienghneix, gou ndaejgeiq aen gojsaeh boibohliz gang neix lo. Bouxvunz yienghneix, couhcinj cij miz amq heiq he, de hix rox roengzrengz bae rag cik fwngz baenzgoeng.