Aiq mbouj rox bienq laux, gij de ce roengzdaeuj dwg feiz itcig coemh dwk caeuq ronghlwenq ciengxlwenx mbouj rox ndaep, gwnzbiengz neix lij miz, couhdwg aeu de guh bwnh.

——Cojlah

Gij gojsaeh neix youq ndaw cigunghgyauh fatseng. Gyaq ci neix cingq coh baihnamz menhmenh haibae.

Miz bouxlaux byomnyieg he naengh ndaw ci neix, ndaw fwngz de gaem bog va ndeu, ci hai gvaq gyaudangz seiz, hwnjdaeuj boux dahsau he, de itcig mbouj nyeng gyaeuj dwk yawj bog va ndaw fwngz bouxlaux haenx.

Daengz bouxlaux neix yaek roengz ci seiz, de sawqmwh hawj boux dahsau neix bog va de gaem haenx. De naeuz:“Gou yenzlaiz dajsuenq soengq bog va neix hawj yah gou, hoeng, gou yawj ok mwngz gyaez bog va neix dangqmaz, gou siengj yah gou hix angq dwk soengq hawj mwngz. Gou rox lwnh hawj de gou gaenq soengq bog va neix hawj mwngz lo.”

Boux dahsau neix gaem maenh bog va bouxlaux neix soengq hawj, dasoengq bouxlaux neix roengz ci, yawjraen de menhmenh byaij daengz bakdou aen mohcungq he.