Ndwensam cin dauqma

Gominz va hoengzhwd

Nazheuj sai naeuz mbwk

Bouxboux dwk giuzyieng

Bouxcuengh dwk giuzyieng

Biengz Nazheuj guh caux

Daj mwhgonq ciuhlaux

Saumbauq angq guhcaemz

Geij bak bi gaxgonq

Vunz donq mbouj baenz gwn

Guh hong ngoenz lienz hwnz

Bwnhengh cungj loenq liux

Cin daeuj cix doekgyaj

Muenghcaj haeux baenz sou

Gouz donq haet donq caeuz

Mbouj rox you rox heiq

Seizgonq nou roeg lai

Bibi sai nazgyaj

Mbaekgwnz daengz mbaeklaj

Nyoegnyamx gvaq doh caez

Daxgoeng Mbanjgorenh

Simgenx rox geijlai

Caen siengj dit dah dai

Mbouj nyienh lai souhhoj

Gwnzmbwn lij haida

Ronggya cimh raemx daeuj

Bwngaeq cap baenzyaeuj

Biu daengz gyaeuj haenznaz

Cap bwngaeq ronggya

Dayawj dangq duzromh

Gyoengq roeg nou sanqcumx

Lumj duznou raen meuz

Ndaej “duzromh” dakfuk

Raeuz cib cuk cib ndei

Ndwensam ndaem roengzbae

Ndwenroek haeux rim guengx

Naz baenz gyo mehmbwn

Ndaej gwn gyo “duzromh”

Bouxlaux nem bouxnomj

Cungj rox “duzromh” ndei

Haeuj cin guh “duzromh”

Gingq lumj gingq saenzlingz

Gyo “duzromh” aencingz

Riuzmingz cien fanh daih

Bi ciemh bi dem saek

Guh baenz ndaek giuzyieng

Baenz doenghyiengh gitsiengz

Ciengz okdaiz biujyienj