“Meh, haemhneix gou youq ranz muiiq ninz ndaej lwi?” Mouiq angqvauvau buet ma ranz cam daxmeh.

“Ndaej dwg ndaej，” Daxmeh mouiq naeuz: “Hoeng, daxmeh miz di damyou bw.”

“Daxmeh, mwngz damyou gijmaz ne?”

“Damyou mwngz caeuq muiiq caemh ninz aen mbonq he, gyanghwnz ngaiz doek roengz mbonq daeuj.”

Mouiq riu lo, naeuz:“Meh, gou baujcingq mbouj doek roengz mbonq daeuj, muiiq hix mbouj doek.”

“Hoeng daxmeh lij dwg damyou.” Daxmeh mouiq itmienh gangj itmienh sou buh dak youq baihrog haenx.

“Meh, mwngz lij damyou gijmaz?”

“Damyou sou guhcaemz guh dwk lumz ninz bae.”

“O, meh, gou baujcingq dou cij guhcaemz daengz gouj diemj cung, baez daengz gouj diemj, couh gven daeng ninz.”

Daxmeh ngaek gyaeuj lo.

Gwn sat haeuxcaeuz, mouiq yaek bae ranz muiiq. “Meh, caiqraen!” Mouiq angqvauvau naeuz.

“Caiqraen!” Daxmeh mouiq cingj ndei buh mouiq, da yawj mouiq byaij bae gyae.

Ngoenz daihngeih gyanghaet, mouiq caeuxcaeux couh ma ranz lo. Song aen da de youh nding youh gawh.

Daxmeh mouiq yawj mouiq cam:“Mwngz mbouj ciuqseiz ninz ha?”

“Mbouj dwg law, daengz gouj diemj dou couh gven daeng ninz lo.”

“Yienghneix sou itcig gangj- vah?”

“Mbouj ne, meh, dou coenz vah he hix mbouj gangj, muiiq ngamq ninz roengz mbonq couh ninzndaek lo.”

“Mwngz ne? Mwngz ninz mbouj ndaek ha?”

“Dwg ha, meh, gou itcig siengj mwngz, ca mbouj lai siengj mwngz hwnz ndeu……” Mouiq gangj dwk gangj dwk, sing yied daeuj yied iq, aen’gyaeuj de ing youq gwnz mbaq daxmeh, diemzsisi ninzndaek lo.

(Ginh Genvaz)