Siengcouh Yen youq seiz haiguh bi 2016 “sam nyied sam Bouxcuengh” caeuq “ndwen senhconz minzcuz doxgiet cinbu” gak hangh hozdung, gvangqlangh yungh Sawcuengh caeuq haiguh gij hozdung mizgven Sawcuengh, caenh’itbouh gyagiengz ndawbiengz yungh vah saw minzcuz, haenqrengz senhconz le cwngcwz vah saw minzcuz.

It dwg gvangqlangh yungh Cuengh Gun song cungj saw guh senhconz. Gij vengzfuk、baengzmuq、 banjbau bau- douz、 senhconz swhliu byauhdiz daengj cienzbouh hozdung ndwen senhconz caeuq “sam nyied sam” cungj yungh Cuengh Gun song cungj saw. Ciuq mbouj cienzbouh doengjgeiq, gij vengzfuk、 baengzmuq daengj yungh Cuengh Gun song cungj saw miz 200 diuz doxhwnj, hawj cwngcwz vah saw minzcuz ndaej gvangqlangh doigvangq caeuq senhconz.

Ngeih dwg cujciz haiguh Sawcuengh caeuq Vahcuengh gven- daengz hozdung. 4 nyied 6 hauh, aen yienh neix youq song vah saw hagdangz guhyiengh Daloz Cungsim Hagdangz banh sij、 doeg Sawcuengh caeuq ciengq go Vahcuengh doxdax, daengx hagdangz lauxsae hagseng caeuq dang- dieg vunzlai yiengjsouh le baez vah saw minzcuz hoihhoengh ndeu, aeundaej yaugoj gig ndei. 4 nyied 13 hauh, aen yienh neix Majbingz Cin banh cangh- fwen Fwencuengh beizyinbanh caeuq Fwencuengh doxdax, 60 lai boux bouxgyaez Fwencuengh camgya beizyin caeuq doxdax. Doenghgij hozdung neix caenh’itbouh doicaenh le yungh caeuq swnjcienz Sawcuengh Vahcuengh.

(Veiz Veimingz/韦卫明)