Daezhwnj sietdiuz, cungj dwg sawj vunz siengj daengz de dwg diemzsisi liengzyauyau, hoeng gou moix baez yawjraen sietdiuz, ndawsim cungj miz cungj raeujrub he nyoenx okdaeuj.

Bi’gvaq sujgyaj, gou youq aen bujsizbanh he hwnjdangz. Ngoenz he banringz, gou bae bujsizbanh haemq caeux, couh caeuq geij boux doengz- hag laeglemx dwkbej. Dou cingq dwk ndaej mizyinx, mbouj rox byawz sawqmwh hemq: “Lauxsae daeuj lo!” Doengzhag youq baihrog cungj buet haeuj gyausiz lo, gou hix gipmuengz ngaem ndang bae ra gouh haiz gou duet okdaeuj haenx. “Bung” sing ndeu, aen’gyaeuj gou bungq deng aendaiz lo, caen in ha! Gou yungh fwngz bae lumh, gwnz gyaeuj gingqyienz gawh aen dok he lumj naed duhdoem nei. Gou daenj haiz le doeknaiq dwk byaij bae coh diegnaengh gou, gou siengj cuengqhag ma ranz le baenzlawz caeuq daxmeh gangj, yawjdaeuj noix mbouj ndaej deng daxmeh moeb can he lo.

Lauxsae gig vaiq byaij haeuj gyausiz daeuj lo, de yawjraen gou aeu fwngz goemq aen’gyaeuj, couh cam: “Vuz Cinhenh, aen’gyaeuj mwngz baenzlawz la? Vihmaz cungj goemq de ya?” Gou gizlawz gamj gangj vahsaed, lauxsae caeux couh gangj gvaq mbouj hawj daeuj bujsizbanh caeux lai, vanzlij mbouj hawj youq bujsizbanh dwkbej, danghnaeuz rox caensaed cingzgvang, gou mbouj couh deng bae ha! Siengj daengz neix gou couh yaeuh naeuz: “Haxbaenh hwnj lae seiz mbouj siujsim bungq deng lanzganh aenlae hane.” Lauxsae daj gwnz gyangjdaiz byaij roengzdaeuj, byaij daengz henz ndang gou, dawz gaiqfwngz gou bae, yaengyaeng lumh giz gawh, itmienh lumh itmienh nyaeuq bwnda naeuz:“Gawh baenz hung ha, baenzlawz mbouj siujsim di ha? In mbouj in ha?” Lauxsae bingzseiz gig yiemz haenx, seizneix gangjvah gingqyienz dingz ndeu dwg naeuz gou dingz ndeu dwg sim’in. Gou ganjvaiq naeuz:“Mbouj miz gijmaz law, yaep ndeu couh ndei lo.”

Lauxsae yaek daiq gou bae yawj canghyw, gou gamjdaengz mbouj youqgaenj genhciz mbouj bae. Lauxsae couh daj ndaw cienzbau de dawz maenz ngaenz ndeu okdaeuj, ndenq hawj Cau Vwnzboz naeuz: “Mwngz bae cawx gaiq sietdiuz ndeu ma.” Geizgvaiq lo, lauxsae cawx sietdiuz ma guh gijmaz？Nanzdauh dwg siengj gwn? Siengj mbouj daengz lauxsae lumj gou nei ngah gwn. Gou youq ndawsim caeg riu. Gig vaiq Cau Vwnzboz cawx sietdiuz ma lo. Lauxsae ciep gvaq sietdiuz byaij coh gou, daengz henz ndang gou le dawz sietdiuz cuengq youq giz gawh aen- gyaeuj gou, doiq gou naeuz: “Fwngz swix fuz youq, gaej hawj de doek roengzdaeuj.” Giz gawh haxbaenh lij insep haenx, sawqmwh bienq liengz lo, cwxcaih haujlai.

Dangz goq he gig vaiq couh gvaqbae lo, roengzdangz le, gou roxnyinh giz gawh gwnz gyaeuj mbouj in geijlai lo. Gou youh ra aengingq daeuj yawj, naed gawh hix siu bae lo, cij dwg lij miz di nding lo.

Lauxsae caen coengmingz ha, cij yungh diuz sietdiuz he couh gaijgez aendok gwnz gyaeuj gou, doengzseiz hix gaijgez aendok ndawsim gou——mbouj yungh heiq ma ranz deng moeb lo! Mbouj dwg bw, lauxsae mbouj dandan coengmingz, lij miz aensim gyaez hagseng he. Daj seizhaenx hwnj, “lauxsae” song cih saw neix bienq ndaej caeuq vunz ndaw ranz yienghneix caenciet lo.

(roek nienzgaep Vuz Cinhenh)