Bonjbau siusik（gicej Couh Yi) 4 nyied 10 hauh, gicej bae daengz Ningzmingz Yen Cwngzcungh Cin Yacouh Cunh, yienhciengz yawjngonz le ciengz minzcuz conzdungj dijyuz doxdax gig miz minzcuz conzdungj fungcingz feihdauh ndeu——ciengj bauqva.

Youq aen dieghoengq gvangqlangh 100 lai moux haenx, yungh haujlai fuk geiz hoengz、henj、lamz、heu geij cungj saek humxok gizdieg ciengj bauqva. Ciengj bauqva itbuen guh sam ciengz doxdax, moix ciengz diemj aen bauq ndeu, moix aen bauq gak miz eiqsei. Aen daih’it dwg“bauq ding”，eiqsei dwg muengh ndaw ranz vunz lai hoenghvuengh; aen daihngeih dwg“bauq caiz”，eiqsei dwg muengh fatcaiz baenzfouq; aen daihsam dwg “bauq gviq”, eiqsei dwg muengh ndaw ranz fouqgviq, saedceij vuenyungz.

Ngoenzhaenx banhaet 11 diemjcung，Yacouh Cunh geij cien vunz comz youq ciengzdieg ciengj bauqva haenx, vunzlai riunyumnyum sim angqyangz, ciengzmienh gig nauhyied. “Bung!” Aen singyiengj le, bauqva mbin hwnj gwnzmbwn bae, gyoengq boux doxdax ciengj bauqva haenx sikhaek riengz gij fuengyiengq bauqva doek roengzdaeuj buet gvaqbae. Ginggvaq song doih vunz geij baez doxciengj doxbeij caeuq ndaw doih doxboiqhab, Cau Yenjfuz Yacouh Cunh bauj gaenj aen bauqva, buet ok henzgyaiq ciengzdieg. Aen loz youq ndaw fwngz bouxbuenq deng roq yiengj, doxdax ciengj bauqva daeuz neix cij sat.

Doeklaeng bauq daihngeih、daihsam diemjdawz le, daengx mbanj bouxlaux bouxcoz, bouxboux cungj bae ciengj, youq gwnz ciengzdieg haenx, mwngz gyaep gou, gou laeh mwngz, bouxboux riunyumnyum; yienhciengz bouxyawj caemh angqvauvau, nauhyied raixcaix.

Sam ciengz doxdax guhsat le, sam boux ciengj ndaej bauqva haenx, gaem gij ciengjbinj sim diemz lumj dangz nei, youq gyoengq baengzyoux、caencik humxveiz cungqgyang, it loh cuengq bauq、roq laz dub gyong dauqma ranz, yawjraen bouxboux cungj sim angq naj riu,vuenheij raixcaix.