Miz song bouxsien okdaeuj lijhingz, daengz ranz bouxmiz youq haemh ndeu. Ranz vunz neix doiq gyoengqde mbouj ndei geijlai, mbouj hawj gyoengqde youq hongq fuengz ndei ninz, cijdwg hawj gyoengqde youq aen gungx ndaw deihgoengq ninz. Gyoengqde beiq mbonq seiz, bouxsien laux raen gwnz ciengz miz aen congh ndeu, couh swnhbienh coih ndei lo. Bouxsien coz couh cam vihmaz, bouxsien laux dap naeuz:“Miz gaiq saeh mbouj dwg mwngz yawjraen yienghhaenx.”

Haemh daihngeih, song bouxsien neix daeuj daengz ranz bouxhoj ndeu youq haemh he. Gvanbaz ranz neix doiq gyoengqde gig simhoengz, aeu di gijgwn ndaw ranz cijmiz okdaeuj hawj song bouxsien neix gwn, doeklaeng youh hawj gyoengqde ninz youq gwnz congz swhgeij. Ngoenz daihngeih ranzrongh, song bouxsien neix raen gvanbaz neix cingq daej. Yenzlaiz dwg duz vaizcij ranz de dai lo, duz vaizcij neix dwg goekgaen ranz neix ndaej ngaenz dog. Bouxsien coz hozhwnj dangqmaz, de vaek bouxsien laux:“Vihmaz baenz yienghneix? Ranz daih’it gijmaz cungj miz, caemhcaiq youh ged, doiq dou mbouj ndei, mwngz lij bang gyoengqde coih congh ciengz. Ranz daihngeih yienznaeuz gungzhoj, hoeng lij dawzok gijgwn ranz de cijmiz daeuj dakdaih bouxhek. Hoeng, mwngz mbouj bae lanz duz vaizcij ranz de dai. Gou siengj mbouj doeng mwngz vihmaz baenzneix guh!”

“Miz gaiq saeh mbouj dwg mwngz yawjraen yienghhaenx”, bouxsien laux dap naeuz, “Dou youq aen gungx ndaw deihgoengq ninz seiz, gou daj congh ciengz yawjraen baihndaw cang rim ndaekgim. Aenvih bouxcawj ranz haenx gig ged, mbouj haengj bouxwnq daeuj faenyiengj doxgaiq ranz de, ndigah gou couh dienz aen congh ciengz bae, hawj gyoengqde ciengxlwenx hix mbouj rox miz aen congh cang ndaekgim couh youq ndaw deihgoengq ranz de. Haemhlwenz, bouxsien guenj bouxvunz lix roxnaeuz dai daeuj daengz ranz gungzhoj neix, yaek daiq boux baz neix bae yaemgan, gou couh hawj duz vaizcij ranz de lawh de. Ndigah, miz gaiq saeh mbouj dwg mwngz yawjraen yienghhaenx.”