Gou ndaej 1 bi lai seiz, daxmeh gou couh gvaqseiq lo, ndigah youq ndaw ndaejgeiq gou, doiq daxmeh gou mbouj miz maz yaenqsiengq, couh cam naiq gou, naiq gou naeuz:“Daxmeh mwngz maj ndaej gig gyaeundei, caeuq daxmeh Dahyieng doxdoengz.” Doek- laeng, gou baez yawjraen daxmeh Dahyieng couh ngaez, muengh de, couh lumj muengh raen daxmeh gou.

Gou heuh daxmeh Dahyieng guh simjngeih, gizsaed de mbouj dwg caen simjngeih gou, cijdwg dou dwg vunz aen mbanj he, caezgya cungj maij heuh ndaej ndiepgyaez di. Simjngeih doiq Dahyieng gig ndei, bang Dahyieng dauz mengq, ndeiyawj dangqmaz. Gou naeuz:“Simjngeih, mwngz hix bang gou dauz mengq, baenz mbouj baenz?” Simjngeih naeuz:“Seizneix gou mbouj bienz, ngoenzrawz caiq gangj.” Gou nyinhnaeuz simjngeih gvaq song ngoenz liux couh rox bang gou dauz mengq dahraix, couh itcig naihsim dwk caj. Hoeng, byawz rox song ndwen gvaqbae lo, gwnz gyaeuj gou lij dwg byoz byoem luenhnyagnyag he. Neix hawj gou engqgya hozhaenz Dahyieng lo.

Gou ceng mbouj lai ngoenz- ngoenz bae daengz ranz Dahyieng youz. Ndaw suen ranz de miz go faexmakcauj hoengz he, makcauj hoengz caengz baenz seiz, Dahyieng couh iu gou itheij bae caeg makcauj hoengz daeuj gwn. Gou naeuz:“Gou mbouj gamj, gou lau daxmeh mwngz moeb gou.” Dahyieng naeuz:“Daxmeh gou mbouj youq ranz.” Gou naeuz:“Daxmeh mwngz mbouj youq ranz gou hix lau.” Dahyieng yiemz gou mbeiiq, couh gag bae caeg makcauj hoengz. Gomakcauj hoengz miz coeg lai, Dahyieng bin mbouj hwnjbae, couh aeu diuz faexmbaenq daeuj mboengj, cingq mboengj ndaej angq seiz, simjngeih dauqma ranz lo. Simjngeih hozhwnj swdswd, aj bak hut vunz, gaemh Dahyieng couh yaengx fajfwngz hwnjdaeuj yaek fak gvaqbae. Gou siengj, baez neix Dahyieng camj lo. Byawz rox, fajfwngz simjngeih yienz- naeuz yaengx ndaej sang, hoeng, roengzdaeuj cij gig mbaeu, bungz daengz fajnaj Dahyieng couh lumj nged yienghhaenx. Dahyieng vut roengz diuz faexmbaenq haenx, riuhaha dwk buet ok rog bae lo.

Haemh haenx, gou fangzhwnz moengh raen simjngeih hix lumj fak Dahyieng yienghhaenx, gig mbaeu dwk fak gou. Fajfwngz de dwg baenzneix unq.

Ngoenz daihngeih, gou hix lumj Dahyieng yienghhaenx, aeu diuz faexmbaenq bae mboengj gomakcauj hoengz ranz de. Ngamq mboengj ndaej sam seiq baez, simjngeih couh daj ndaw ranz okdaeuj lo, de hut naeuz:“Lwg doenghduz, mwngz gawqyienz gamj daeuj caeg makcauj hoengz gou! ” Gou vut diuz faexmbaenq bae, ndwn youq gizhaenx mbouj ning, caj simjngeih daeuj gaemh gou. Simj- ngeih gaemh ndaej gou, couh yaengx fajfwngz gig sang. Gou laepda, caj fajfwngz de dog youq gwnz fajnaj gou. Hoeng, gou cij dingqnyi sing “ba” gokrad, naj baihswix gou couh youh in youh manh, ndaw bak gou youh haemz youh diemz, biq amq he daengz gwnz namh, gingqyienz dwg lwed hoengzsaksak.

Fajfwngz simjngeih neix, hawj gou yaep he couh maj lo. Baez neix liux, gou caiq hix mbouj maqmuengh miz boux vunz he lumj daxmeh nei daeuj gyaez gou lo.