Bi 2015, Dwzbauj Yen daj hag- dangz goqdangz gaem hwnj, netsaed haiguh baenzdauq minzcuz doxgiet gyauyuz haeuj hagdangz hozdung fungfouq lai yiengh, aeundaej cingzcik gig ndei.

It dwg minzcuz doxgiet gyauyuz yungzhaeuj sonhag goqdangz. Daengx yienh gak cungh siuj hagdangz cungj hai miz minzcuz doxgiet gyauyuz goqdangz, cungfaen leihyungh cwngci、 yijvwnz、 dijyuz、 dozveh、 ciengqgo daengj yozgoh miz minzcuz cangzsiz gyauyuz yinhsu haenx, haiguh minzcuz cihsiz buqmungz caeuq minzcuz lijlun gyauyuz, hawj hagseng cienzmienh roxyiuj caeuq hag rox minzcuz cwngcwz、 minzcuz fungsug、 deihfueng fungcingz daengj cihsiz neiyungz dangj, gungganq hagseng laebhwnj minzcuz doxgiet siengjnaemj, gyagiengz doxgiet doxhab yisiz.

Ngeih dwg minzcuz doxgiet gyauyuz hozdung fungfouq lai yiengh. Bi 2015, youq daengx yienh gak cungh siuj hagdangz cujciz haiguh gij minzcuz doxgiet gyauyuz “roek ndeu” hozdung “ciengq hot go minzcuz ndeu, veh fuk veh minzcuz fungcingz ndeu, ok banj banjbau minzcuz doxgiet ndeu, banh baez minzcuz fapgvi cihsiz doxdax ndeu, guh gienh minzcuz gunghyi cozbinj ndeu, hai baez cawjdaez banhoih ndeu”, doenggvaq baenzdauq hozdung fungfouq lai yiengh, dajcaux hagdangz minzcuz vwnzva heiqfaenh naekna, hawj minzcuz doxgiet gyauyuz haeuj hagdangz hozdung miz rengzlix moq.

Sam dwg haenq gaem daezsang minzcuz doxgiet gyauyuz suciz. Dangqnaj, aen yienh neix gungh miz Cuengh Gun song vah saw hagdangz 8 aen, miz 46 aen ban. Cimdoiq song vah saw sonhag hagdangz lauxsae gangjvei yaek yungh haenx, cujciz banh le song vah saw lauxsae yienh gaep beizyin caeuq yaubwnj beizyin, aeu minzcuz yijvwnz cwngcwz、 Sawcuengh giekdaej cihsiz、 goqdangz sonhag ginwngz、 goqdaez yenzgiu daengj neiyungz guh cungdenj beizyin, caenh’itbouh daez- sang song vah saw lauxsae yezvu cihsiz suijbingz, coicaenh daezsang song vah saw gyauyuz sonhag cizlieng.

Seiq dwg hong Cuengh Gun song vah saw miz sing miz saek. Banh “Dwzbauj Yen bi 2015 siujhagseng biucinj Vahcuengh dungxcaiz biujyienj doxdax” “Dwzbauj Yen gaiq daihsam siujhagseng doeg Sawcuengh doxdax” daengj hozdung, gikfat gij yiedcingz hagseng hagsib saw vah minzcuz, coicaenh daezsang Cuengh Gun song saw vah gyauyuz sonhag cizlieng.

(Nungz Yungjfang/农永放)