Bi 1975 ndwen 10, Veiz Goz- cingh diuh bae Guengjdoeng guh boux suhgi daih’it caeuq boux cujyin Swngj Gwzveijvei, caemhcaiq laebdaeb giem boux cwng’veij daih’it Diegbing Gvangjcouh, daj seizneix hwnj, duenh lizsij de youq Guengjsae guh hong 20 bi satbyai lo.

Veiz Gozcingh guh gwzming ndaej 60 bi lo, duenh seizgan de youq Guengjsae guh goengdaeuz 20 bi dwg mbaw biencieng ronghlwenq de camgya gwzming seveicujyi caeuq sizcenj hungmbwk hwnjguh seveicujyi.

Youq Cungguek, gyoengq vunz ligdaih hoenx dienyah mbouj itdingh dwg gyoengq vunz guenj dienyah, mizmbangj gaem ndaej cwnggenz le, dingzlai couh yungh aen banhfap “doiq vunzgoenglauz, genj vunzyouq- ndoj”, hawj gyoengq vunzgoenglauz gwih max hoenx ndaej dienyah haenx deuz gvaq henz bae, dauq yungh gyoengq vunz miz sawmaeg haenx daeuj guenj guekgya. Cunghgoz Gungcanjdangj dwg caijyungh aen banhfap doihbing bienq doihhong, hawj gyoengq vunz hoenx dienyah haenx vanzlij dwg gyoengq vunz guenj dienyah. Mauz Cwzdungh youq yaek dued ndaej cwnggenz daengx guek haemhgonq couh vixok: Raeuz itdingh yaek aeu 210 fanh bing yejcanginh cungj cienjbaenz doihhong. Caemh- caiq youq seizneix, daihliengh supsou vunzsawmaeg daeuj camgya hwnjguh cwnggenz caeuq hwnjguh ginghci vwnzva.

Cunghvaz Yinzminz Gunghozgoz laebbaenz le, Veiz Gozcingh caeuq gyoengq bouxcieng wnq doxdoengz, gonqlaeng cienj daengz deihfueng guh goengdaeuz. Mboujgvaq, ndaw gyoengq sangcieng bihaenx lumj de yienghhaenx youq aen dieg laebdaeb guh hong 20 bi, lauheiq de dwg boux dog.

Veiz Gozcingh youq Guengjsae guh goengdaeuz seiz, cingqngamj dwg seiz seveicujyi daengx guek gaijcauh gihbwnj guh baenz, byaij haeuj hwnjguh seveicujyi caemhcaiq hainduj damqra diuzroen Cungguek gag hwnj- guh seveicujyi. Youq aen vanzging lizsij gig fukcab lajde, de genhciz yungh Cujyi Maj-Lez、Swhsiengj Mauz Cwzdungh caeuq gij gwzming seveicujyi caeuq sizcenj hwnjguh doxgap hwnjdaeuj, roengz- rengz gaemdawz caeuq yinhyungh gij gvilwd gwzgvanh fazcanj ginghci daeuj sonyinx hwnjguh Guengjsae, mboujduenh daezsang gij suijbingz dazyinx. De caeuq haujlai gyoengq goengdaeuz seizdaih haenx dox- doengz, miz gvaq gij cingzcik ronghsagsag, hix miz gvaq mbangj yienghneix roxnaeuz yienghhaenx mbouj ndei caeuq loengloek.

(caengz sat)