Ngoenzsinghgiz, daxboh vihliux hawj gou daejnienh lajmbanj baenz- lawz gwndaenj gvaq saedceij, couh gietdingh daiq gou bae ranz daxbuz youq lajmbanj haenx guhcaemz. Ngoenz haenx mbwnlamz gvengqgvwt, heiqci youq gwnz loh lumj mbin nei hai dwk, hoeng gou siengj daengz lajmbanj haeuxgyanh byaek- heu, mbouj miz vangjloz, couh roxnyinh mbwnraemh mbwnfuemx. Ae! Vih maz bae gizhaenx ha!

Daengz vaiqhaemh, heiqci hai gyawj aenmbanj ranz daxbuz. Ngamq haeuj mbanj, gou couh yawjraen hoenzfeiz mbinfengfeng, duzvaiz geq youq laj ndithaemh gag byaij, lij miz bienmbwn benq fwjhaemh haenx. Gij gingjsaek gyaeundei neix lumj fuk veh nei sawj gou baihnaj ronghsagsag.

Gyanghaemh, gou ninz youq gwnz congz, song da yawj rog cueng, ndawsim siengj aensingz daeng rongh- myagmyag, siengj aen ranz youq ndaw singz haenx. Seizhaenx rongh ronghndwen ndonj gvaq cuengfaex ciuq haeuj ndaw ranz daeuj, gijmaz cungj dwg mumjmumj gyumq- gyumq. Daihdeih lumjbaenz caemninz loh, cawzle saek seiz miz ma raeuq geij sing, caen caemdingh ha. Gou gig vaiq couh ninz ndaek lo.

Gyanghaet, sing gaeqhaen dwk- byoengq lajmbanj caemdingh, hix heuh gou ndiu lo. Gou hai dou, raq hoengheiq singjsien he ci haeuj naj gou. Gou nyaenx mbouj ndaej sup geij gaemz, cig sup haeuj ndawdungx ndawsim bae. Byaij ok aenhongh bae, daengngoenz ngamq hwnjdaeuj, caengz mok mbang ciemhciemh sanq bae. Seizhaenx, gwnz nyefaex、gwnz mbawnywj、gwnz dipva cungj nem miz raemxraiz ndongqndikndik. Gou yaengyaeng bungq mbat he, raemxraiz couh ringx daengz gwnz fwngz gou, liengzsisi. Ngiengx gyaeuj yawj, gyoengq vunz gaenxgyaek haenx gaenq laeblaeb daebdaeb ok dou, byaij bae coh doenghnaz, hainduj guh ngoenz hong gyoengqde. Gvaq yaep ndeu, lwgnyez hix yied daeuj yied lai. Gyoengq lwgnyez noh ndaemndwt he youq laj gorungz gyaeujmbanj guh- caemz. Baenz raq baenz raq sing riu yinx gou byaij daengz henz ndang gyoengqde. Gyoengqde angqcoux gou caeuq gyoengqde guhcaemz. Cungj angqyangz caengz miz gvaq haenx sawj gou haisim riuhaha hwnjdaeuj……

Mbouj rox seiz lawz daengz banngaiz lo, ranzranz cungj miz cungj heiqhom haeuxbyaek he mbin ok- daeuj. Daihgya cungj byaij ma ranz swhgeij. Gvaq yaep ndeu, daihgya youh gaem vauj haeuxbyaek he comz daengz laj gofaex, mwngz cimz gij gou, gou cimz gij mwngz. Gyoengqvunz lumj gwndaenj youq aen ranz doxhuz he, gij vuenyungz caeuq muenxcuk cungj youq gwnz naj gyoengqde biujyienh okdaeuj.

Saedceij lajmbanj mboujlwnh seiz lawz cungj dwg yienghneix sawj vunz angqyangz. Gou gyaez hwnj cungj saedceij lajmbanj daegbied、swyouz、hawj vunz maez haenx lo.

(seiq nienzgaep Lij Veijvaz)