3 nyied 27 hauh, Cungzcoj Si Gyangh- couhgih ciet bauqva byagim nem ndwen vwnzva lijyouz hozdung youq Cojcouh Cin banh, doengzseiz ndwen senhconz minzcuz doxgiet cinbu hozdung hix hainduj lo.

Hozdung hingzsik lai cungj lai yiengh, miz doiq fwen、 ciengj bauqva、 bau aendomq daengj conzdungj dijyuz hanghmoeg biujyienj, gig miz yinx caeuq minzcuz daegsaek naekna, hawj vunz yawj dwk lwgda mbouj yaep. Doengzseiz, lij cujciz haiguh lijyouz gingjdiemj、 huq daegsaek doigvangq gaisau hozdung, baij ngaizbakranz. Gyanghcouh Gih Minzcuz Swvugiz、 Minzyijban yungh aen seizndei neix, gaenxmaenx haiguh senhconz minzcuz cwngcwz faplwd fapgvi, laeb senhconzlanz 2 gep, venj mbawbaengzhoengz senhconz Cuengh Gun song cungj saw 10 diuz, fat bonjsenhconz 1000 lai bonj, fat daehvanzbauj fwngzriuj yaenq miz minzcuz cwngcwz haenx 450 aen. Neix mboujdan caenh’itbouh swnjcienz caeuq fatyiengz Bouxcuengh conzdungj vwnzva maenhndei, fungfouq vwnzva saedceij vunzlai, youh cungfaen vatcimh caeuq baijyienj vwnzva goekdaej naekna Gyanghcouh Gih, dajcaux le minzcuz conzdungj vwnzva binjbaiz, hix vih Gyanghcouh Gih minzcuz doxgiet cinbu senhconz laebhwnj aen bingzdaiz ndei ndeu.

(Cang Yenz/臧 源 Veiz Veigenh/韦慧娟)