3 nyied 30 hauh, Cingsih Si youq Cunghsanh Gvangjcangz banh bi 2016 “sam nyied sam” Bouxcuengh conzdungj ciet fwen hozdung, doengz- caez angqhoh conzdungj ngoenzciet Bouxcuengh raeuz, yinx ndaej ca mbouj geijlai 2 fanh boux vunz daeuj yawj.

Hozdung guh ngoenz ndeu, ceiqgonq youz si minzcuz cunghyoz lauxsae hagseng guh bau aendomq biujyienj, daihgya itheij camgya hozdung. Riengzdwk haiguh ndawbiengz minzsuz vwnzyi comzyienj, daihhingz fouxgoengfou 《Nungz Cigauh Loeg Geiz Binghcin》、 diuqfoux 《Foux Loenghlab》、 Fouxmyauz 《Cingz Aenvenz》 caeuq swcigih gaep feihyiz hanghmoeg《Angqhoh Fungsou》 daengj hwnjdaiz yienjok, lij miz fwen comzyienj、 cai fwen doxdax、 eu fwen doxdax daengj hozdung dem.

Cingsih Si bi 2016 “sam nyied sam” Bouxcuengh conzdungj ciet fwen hozdung cawjdaez dwg gak minzcuz doengzcaez doxgiet haenq guh、 doengzcaez hoenghvuengh hwngfat, haenqrengz senhconz le minzcuz cwngcwz dangj caeuq guekgya, fatyiengz le minzcuz vwnzva, vih Cingsih cauxlaeb daengx guek minzcuz doxgiet cinbu sifan si okrengz, vih henzguek gak cuz beksingq daezhawj gij cingsaenz saedceij fungfouq.(Cau Sinhveih/赵新辉)