Bi 1973 ndwen 9, ciuq gij yigen Veiz Gozcingh, Dangjveij、Gwzveijvei Swcigih faenbied sij baugau hawj Dangjcunghyangh caeuq Gozvuyen cingjgouz guhgvangq Fangzcwngz- gangj, caemhcaiq soengq faenh sawyigen Fangzcwngzgangj bwh guh diegdozruz raemxlaeg gaepfanhdun he hwnjbae, ndaej daengz Dangj- cunghyangh caeuq Gozvuyen baecinj. Ngamq haidaeuz, ngaenzgoek mbouj caengz daengz, Veiz Gozcingh caeuq Liuz Cunggvei、Anh Bingzswngh、Gyauz Yaujgvangh、Cinz Yinggih daengj geij boux suhgi doxyaeng, youz ngaenzcaiz swcigih dawz ok gonq. Aenvih noix gij sezbei gihgai daihhingz, doihguhhong couh ciuq gij diuzgienh haemzhoj dangdieg, yungh fapdoj bae hwnjguh. Ndwen 10, aen daih’it diegdozruz raemxlaeg gaep- fanhdun Guengjsae cingqsik haigoeng guh hwnj lo.

Guh aen diegdozruz gaepfanhdun seiz, Veiz Gozcingh caeuq gyoengq bangfwngz de, youh yaek roengzfwngz guh diuz dietloh Namzningz daengz Fangzcwngzgangj. Veiz Gozcingh nyinhnaeuz, guh baenz aensok Fangzcwngzgangj youh youq baihnamz guek raeuz haiok le aenbak okhaij he, danghnaeuz gyaudoeng riengz mbouj hwnjbae, lij mbouj miz geijlai cozyung. Guh diuz Dietloh Namz- Fangz he, caeuq aensok Fangz- cwngzgangj doxboiqdauq hwnjdaeuj, mboujdan ndaej bang rap mbangj hongrap dajyinh doiq rog gaicawx Cungnamz caeuq Saenamz, gemj- mbaeu gij lienghgyanhaiz Can- gyangh、Vangzbuj daengj aensok caeuq gij gugmienh dajyinh gaenjcieng Dietloh Liz-Can, caemhcaiq hawj gij cienz baihnaj rehaij Bwzbuvanh caeuq gij dieg “sam sienq” Saenamz ndaej cigsoh doxlienz hwnjdaeuj, yienghneix doiq gyamaenh reguek, mbefat doiq rog gaicawx, haifat swhyenz haijyangz, gyavaiq hwnjguh ginghci Guengjsae, cungj miz yiyi hungloet.

Bi 1975 ndwen 2, guekgya doengzeiq swcigih daezok guh diuz dietloh Namzningz daengz Fangz- cwngzgangj ndeu, lij doengzeiq Fangzcwngzgangj youq aen goekdaej gaenq bae guh song aen diegdozruz raemxlaeg gaepfanhdun gwnzde, caiq lai guh 5 aen diegdozruz raemxlaeg gaepfanhdun doxhwnj caeuq gij boiqdauq doxhab dem.

Bi 1975 ndwen 3, Guengjsae dauqdaej youq 1000 lai goengleix sienqhamqhaij gwnzde guh baenz aen daih’it diegdozruz raemxlaeg gaepfanhdun.

Veiz Gozcingh caengz ndaej yawjraen gij diegdozruz raemxlaeg wnq Fangzcwngzgangj guhbaenz caeuq Dietloh Namz-Fangz doengci couh lizhai Guengjsae lo, hoeng gij dwgrengz caeuq gij roengzrengz de vih Guengjsae dwk doeng diuz roenokhaij caeuq gij goekdaej de dwkroengz hawj diuz roenhaij neix, vunzlai gak cuz Guengjsae ciengxlwenx lumz mbouj ndaej.

Seizneix, Digih Ginhcouh gaenq fazcanj baenz Bwzhaij、Ginhcouh、Fangzcwngzgangj sam aen si. Youq guekgya dingjrengz lajde, ginggvaq liggaiq Dangjveij caeuq Cwngfuj Swcigih roengzrengz, gij sok sam aen si mboujduenh ndaej guhgvangq caeuq caezcienz. Dietloh Namz-Fangz ndaej guh baenz sawjyungh le, youh laebdaeb guh le Dietloh Ginh-Bwz caeuq Dietloh Liz-Ginh. Diuz Dietloh Namz-Gunh vunzlai cajmuengh baenznanz gaenq ndaej doengci, gij goengloh gauhsuz daj Gveilinz gvaq Namzningz daengz Ginhcouh、Bwzhaij caeuq Fangzcwngzgangj hix guh baenz gvaq, gij baijbouh canloz Cunghyangh daezok hawj Guengjsae guhbaenz diuzroen okhaij Saenamz gaenq cugbouh ndaej daengz saedyienh.

(caengz sat)