Seizhaenx, gij cancwngh Meijgoz ciemqhoenx Yeznanz mboujduenh hwnjgaep, gyoengqde ok le haujlai gunghginh caeuq luzginh bae caq gij goengloh、dietloh、aengiuz、aenfai caeuq ginzcung baihbaek Yeznanz, lij youq dieghaij、aensok caeuq roenraemx gyaudoeng cuengq suijleiz, siengjndwi gat duenh sojmiz gij bangcoengh baihrog hawj Yeznanz Minzcuj Gunghozgoz haenx. Vihliux bang Yeznanz hoenxdingj Meijgoz gouq guek bonjfaenh, Cunghyangh gietdingh youq Fangzcwngz Guengjsae aen dieg liz Yeznanz ceiq gyawj neix guh aensok bwhhoenx ndeu, yiengh- neix fuengbienh haidoeng gij hangzsienq dajyinh bomz youq gwnz- haij Cungh-Yez.

Seizhaenx, Veiz Gozcingh dwg boux cwng’veij daih’it Diegbing Gvangjcouh caeuq Diegbing Guengj- sae, caemhcaiq youh dwg boux gaemhong Cujiq Bwhhong Veijyenzvei Gwzming Guengjsae, de rox youq Guengjsae guh aensok neix gig bietaeu、gig gaenjgip, caemhcaiq hix yawj ndaej gyae, guh baenz aensok neix doiq Guengjsae doeklaeng haidoeng diuzroen okhaij gig miz cozyung youqgaenj, ndigah de gig gvansim gij hong guh aensok neix, baij gij goengdaeuz maenhndei bae guh gij hong neix.

Hangh hongloet neix dwg bi 1968 ndwen 3 ngoenz 22 ndaej baecinj bae guh, ndigah youh heuhguh “Hongloet 3.22 Guengjsae”. Gij doih guh hong daj gak dieg guek raeuz daeuj daengz, hunghung iqiq miz ciblai ngeihcib aen danvih, miz fanh lai vunz bae. Gyoengqde youq gij diuzgienh “cauz hwnj raemx doh, cauz roengz boengz doh” lajde, ngoenz lienz hwnz dwk roengzrengz guh hong. Boux cijveih- cangj Liuz Ban’gyangh, yenzlaiz dwg boux fucujyin Gunghgyauh Cwngcibu Dangjveij Swcigih ndeu, de ciengzgeiz daiqbingh genhciz youq gwnz dieg- hong, caezrengz caezsim guh hong aensok neix, mwh yaek gvaqseiq seiz, de vanzlij lumz mbouj ndaej gij hong guh aensok.

Ciuq gij iugouz Yeznanz Minzcuj Gunghozgoz, Aensok Fangzcwngzgangj daj bi 1972 ndwen 8 hainduj yinh doxgaiq hawj Yeznanz. Seizhaenx, swcigih laebbaenz le aen Cujiq Dazyinx Bang Yez, Cinz Yinggih dwg cujcangj, aen cujiq neix baihlaj lij laeb miz aen Cijveihbu Bang Yez, youz Ho Vanvaz guh cijveihcangj, gidij anbaiz hong dajyinh. Gij ruz dajyinh vihliux ndoj gvaq feihgih Meijgoz caq, gyangngoenz cang huq hwnj ruz, banhaemh cij haiok, ndonj gvaq gij sienqfungsuj cuengq suijleiz, yinh huq daengz gij dieg Yeznanz ceijdingh haenx, gyanghwnz youh dauqdaeuj aensok. Yeznanz youq gij cancwngh hoenxdingj Meijgoz gouq guek seiz miz song diuz “Roensaej- gaeq Huz Cimingz” gig mizmingz, diuz he dwg gij roensaejgaeq ngutngeuj bomz youq ndoengfaex yezdai, diuz wnq he couhdwg diuz hangzsienq gwnz haij neix lo. Diuz roenhaij neix bang Yeznanz dwkhingz Meijgoz guh ok le gij gungyen gig hungloet, ndaej Yeznanz fathawj gij yinhcangh guekgya.

Bi 1973 nienzco, Meijgoz fouz- naih youq gwnz daizdamzbuenq Bahliz ciemcih dingzhoenx, gij cancwngh lwgminz Yeznanz hoenxdingj Meijgoz gouq guek ndaej hingz lo. Gij hong dajyinh nyaengqnyatnyat Fangz- cwngzgangj gaenq guh ndaej 9 ndwen, seizhaenx hix ndaej satbyai lo.

Seizhaenx, Fangzcwngzgangj gaenq guh baenz itdingh gveihmoz. Veiz Gozcingh yiengq Couh cungjlij daezok, youz deihfueng laebdaeb hwnjguh aensok neix, gaij baenz aensok doiq rog gaicawx ndeu, cungjlij baecinj le gij guhfap neix.

1973 ndwen 4, swcigih laeb- baenz Cujiq Dazyinx Guh Hong Aensok Fangzcwngzgangj, youz Cinz Yinggih guh cujcangj, cienzmienh fucwz dazyinx guh hong aensok.

Bi 1973 ndwen 5, aen Cijveihbu Guh Aensok Fangzcwngzgangj laeb- baenz, youz Couh Vazbyauh guh cijveihcangj, Gyangh Mingz、Siz Gveizlinz guh fucijveihcangj. Boux vunz sojmiz gaxgonq camgya gvaq hong bang Yez guh sok, cungj louz roengzdaeuj laebdaeb guh hong goekdaej, caemhcaiq diuh gij doih caeuq sezbei yenzlaiz hwnj Giuzhung Yunghgyangh daengz Fangzcwngz- gangj guh hong aensok.

(caengz sat)