Boux vunz he gamjdaengz swnghhoz gig naekcaem, couh bae ra bouxlaux ndeu, muengh bouxlaux haenx ndaej bang de gaijgez gij vwndiz neix.

Bouxlaux haenx mbouj gangj gijmaz, cijdwg hawj de aen bied he heuh de aemq, caemhcaiq vix diuz roen sa he naeuz:“Mwngz byaij baez ndeu couh gip ndaek rin he cang haeuj aenbied bae, yawj miz gijmaz gamjgyoz.” Boux vunz haenx ciuq vah bouxlaux haenx gangj bae guh, bouxlaux haenx couh gig vaiq dwk byaij daengz byairoen bae caj boux vunz neix.

Gvaq ndaej yaep ndeu, boux vunz haenx byaij daengz byairoen lo, bouxlaux neix couh cam de miz gijmaz gamjgyoz.

Boux vunz haenx naeuz:“Gamjdaengz yied daeuj yied naek.”

“Aen neix couhdwg yenzyinh mwngz vihmaz gamjdaengz swnghhoz yied daeuj yied naekcaem.” Bouxlaux neix laebdaeb naeuz:“Moix boux vunz daeuj daengz gwnzbiengz seiz, cungj aemq aen bied hoengqvat he, youq gwnz roen seiqvunz byaij yamq he, cungj aeu daj gwnzbiengz neix aeu yiengh doxgaiq ndeu cuengq haeuj ndaw aenbied bae, ndigah couh roxnyinh yied byaij yied baeg. ”

Boux vunz haenx cam:“Miz gijmaz banhfap ndaej gemjmbaeu gij aemqnaek neix?”

Bouxlaux haenx dauqfanj cam de:“Yienghneix mwngz nyienh dawz gunghcoz、aicingz、gyahdingz roxnaeuz youjcingz yienghlawz okdaeuj ne？” Boux vunz haenx dingq le mbouj gangj coenz vah ndeu.

Bouxlaux haenx naeuz:“Gawqyienz cungj roxnyinh sijbae nanz, yienghneix couh mbouj yungh bae siengj gij aemqnaek haenx, wnggai bae siengj angq mwngz miz. Doxgaiq ndaw aenbied moix boux vunz mboujdan cijdwg cang aensiengj gwnzmbwn hawj raeuz, lij miz cwzyin caeuq yivu. Mwngz gamjdaengz naekcaem seiz, lauheiq mwngz wnggai angqging swhgeij mbouj dwg aemq aenbied wnq, aenvih aen bied bouxwnq aemq gojnwngz beij aen mwngz lij hung lai, hix naekcaem lai lo. Yienghneix bae siengj, mwngz mbouj wnggai angq lai?” Boux vunz haenx dingq le sawqmwh roxyiuj lo, gamjdaengz ndawsim de beij gaxgonq soeng lai dahraix.