●3 nyied 2 hauh daengz 4 hauh, Swcigih Minzveij fucujyin Couh Gen daengj 3 boux bae daengz Namzningz Si Majsanh Yen guh diuyenz, caemhcaiq ciuq minzcuz yangh banh laebbaenz cib hopbi angqhoh hozdung hong couzbwh nem minzcuz doxgiet cinbu cauxlaeb hozdung haeuj yanghcin daengj hong guh genjcaz sonyinx.

(Veiz Sangyungz)

●3 nyied 4 hauh, youq Lungzswng Gak Cuz Swciyen singzbaek segih, dangdieg meh- mbwk camgya guh’angq hozdung. Mboengqneix, aen yienh neix haiguh le 《Fap Fanj Gyaranz Bauqlig》 senhconz、 “sam bet” mehmbwk henhoh gienzlig cihsiz gyangjco、 gungzhoj daxmeh byaij- cunz camnai、 guh’angq daengj hozdung angqhoh “sam bet” ciet mehmbwk.

(Veiz Gizyangz)

●3 nyied 4 hauh, Ningz- mingz Yen song gaep gohhez、 dicingiz、 vanzbaujgiz daengj bumwnz lienzhab youq Ningzmingz Yen Cwngzcungh Cin Gyanghbinh Dadau haiguh gohbuj cihsiz haeuj segih hozdung. Gak bumwnz doenggvaq yienhciengz yienjlienh beizyin、 fat swhliu senhconz、 baijok canjbanj daengj fuengsik guh gohbuj cihsiz senhconz, sonyinx segih vunzlai laeb gij saedceij gvanhnen caeuq saedceij fuengsik gohyoz vwnzmingz、 gaenxmaenx doxhwnj.

(Couh Yizgangh Cwng Cunghswngh)

●Mboengqneix, Fuconh Yauzcuz Swciyen gunghsangh bumwnz iucingj mizgven lauxhangz daeuj bangcoengh gunghsangh bumwnz boux hengzfap ok banhfap nyinh rox caen gyaj nungzswh, vih fugsaeh dangqnaj bouxguhnaz seizcin dajndaem cawx nungzswh gemjnoix sonjsaet ok banhfap.

(Cinz Yengiz)

●Geij bi neix daeuj, Yizcouh Si Daihsam Siujyoz haenqrengz dajcaux bingzanh hagdangz, aeu gyaudoeng ancienz、 fuengz dwk- roengz、 fuengz feiz daengj ancienz gyauyuz hozdung bingzciengzvaq, mizyauq daezsang le gyoengq lauxsae hagseng gag gouq gag hen yisiz caeuq naengzlig. Bi 2015, aen hagdangz neix ndaej bingz baenz Hozciz Si “hagdangz ancienz guenjleix hagdangz maenhndei”.

(Veiz Canghyoz Cangh Givaz)