Cangjdienhfeiz Denzdungh, yo youq gwnz bakgumz Meizgvangq Sinhcouh. Ngamq haidaeuz dwg 2.4 fanh cienvax, doeklaeng mbegvangq baenz 7.4 fanh cienvax, dwg aen cangjdienhfeiz cawjlig daihngeih Guengjsae.

Gij cangjdienhfeiz neix ndaej guh baenz douzcanj, daihdaih demgya le gij liengh fatdienh swcigih, youq mwh raemxmbaet seiz gej gij haemzhoj yungh dienh ok liux rengz hung.

Daengz bi 1975, gij liengh daengx gih bi fatdienh daengz 35.19 ik cienvax. Caemhcaiq boiqhab hwnjguh camhdienh, lij gonqlaeng guh baenz Lozdungh daengz Ginhcwngzgyangh、Mazsiz daengz Gveilinz、Sihcinh daengz Yilinz、Sihcinh daengz Hozbuj daengj gij gunghcwngz soengq bienq dienh 11 fanh fuz, hawj gij muengxdienh Namzningzcaeuq Liuj- couh yenzlaiz mbegvangq daengz Hozciz、Gveilinz、Yilinz、Ginhcouh daengj dieg, cugbouh hingzbaenz le muengxdienh Guengjsae.

Bi 1965 ndwen 6, gozvuyen dauqcungz veh gij dieg Ginhcouh hawj Guengjsae guenj, hawj swcigih ndaej benq daihhaij yiengq coh Bwzbuvanh ndeu. Mwh Veiz Gozcingh cawjcingq Guengjsae, roengzfwngz gviveh caeuq hwnjguh diuzroen okhaij, gijneix doiq Guengjsae doeklaeng fazcanj gig miz yiyi gyaeraez.

Dieg Ginhcouh yenzlaiz heuh guh Dieg Ginhlenz, dwg gaiq dieg raezrang baihsae swngj Guengjdoeng ndeu, baih ndeu coh haij, sam baih deng dieghawq Guengjsae heux dawz. Mingzdaih gaxgonq dwg Guengjsae guenj, Mingzdaih doeklaeng couh youz Guengjdoeng guenj. Cunghvaz Yinz- minz Gunghozgoz ngamq laebbaenz mbouj nanz, Guengjdoeng、Guengjsae song aen swngj cungj youz Fwnhgiz Vaznamz Cunghgung Cunghyangh cigsoh guenj. Yez Genyingh dwg boux suhgi daih’it Fwnhgiz Vaznamz、boux cujsiz Cwngfuj Yinzminz Swngj Guengjdoeng、boux swhlingyenz caeuq cwngveij Diegbing Swngj Guengj- doeng, Cangh Yinzyi dwg boux suhgi daihngeih Fwnhgiz Vaznamz、boux suhgi Swngjveij caeuq cujsiz Cwngfuj Yinzminz Guengjsae, boux swhling- yenz caeuq cwngveij Diegbing Swngj Guengjsae. Fwnhgiz Vaznamz ngeix daengz song aen swngj doxgyau, daj fuengbienh dwk caeglaux caeuq engqndei guh gij hong reguek、ginghci gensez okdin, gietdingh gyau gij dieg Ginhlenz Guengjdoeng （baudaengz Hozbuj、Ginhcouh、Lingzsanh、Fangz- cwngz seiq aen yen caeuq Bwzhaij aen si he） hawj Guengjsae guenj, gyau aen Yen Vaizciz Guengjsae cap youq ndaw Guengjdoeng haenx hawj Guengjdoeng guenj. Seizhaenx, gij goengdaeuz cawjguenj hong Guengjsae lumj Cangh Yinzyi、Cinz Manyenj、Moz Vwnzvaz、Lij Denhyou daengj vunz caemh daez gvaq aen yigen neix. Bi 1950 ndwen 10, Yez Genyingh daibyauj Fwnhgiz Vaznamz youq baez hoihdoengzhai suhgi diveij Swngj Guengjdoeng caeuq swhling- yenz fwnhgih diegbing gwnzde gangj le gienh saeh neix.

Bi 1950 ndwen 11, Yez Genyingh daengz Guengjsae sonyinx guh hong, de daegeiq iu gij goengdaeuz dangj、cwng、ginh Lenzginh haenx comz youq Namzningz, caeuq Swngjveij Guengj- sae doxcaeuq yaengdingh, daj bi 1951 ndwen 1 hwnj, gij ngaenzgoek Lenzginh bienhaeuj ndaw yawhsuenq Guengjsae bae ok. Genci gvisug ne, caj dujgaij guh sat le, youz song aen swngj daez yigen, deq cunghyangh baecinj, caiq gunghbu okbae.

Fwnhgiz Vaznamz vihmaz giet- dingh gyau gijdieg Lenzginh Swngj Guengjdoeng hawj Guengjsae guenj, Yez Genyingh gangj le sam aen leixyouz: Daih’it, yawj daengz ginghci, Guengjsae daengx swngj mbouj miz bakokhaij, Lenzginh mbouj miz Guengjsae, couh lumjbaenz vunz miz bak hoeng mbouj miz dungx, Guengjsae mbouj miz Lenzginh nei couh lumj vunz miz dungx hoeng mbouj miz bak. De naeuz, Genhyen gyu daenz baenz ndoi, hoeng vunz Guengjsae yaek aeu 30 gaen haeux cij vuenh ndaej gaen gyu he, cinq caeuq mbanj doxliz gyae, ndaw rog saekbix, ginghci dingzdaengx. Guengjsae dox- gap, gyau hawj Guengjsae guenj, dangqguh aen sokgyan’haiz daeuj guenj, doeklaeng Guengjsae haeuj- guek caeuq okguek cungj mbouj yungh gvaq Yanghgangj、Gvangjcouh lo, ngaenzbonj dajyinh couh ndaej gemjnoix. Yienghneix hawj cinq caeuq mbanj, ndaw caemh rog ndaej doxlienz hwnjdaeuj, ginghci Guengjsae couh ndaej guh hwnjdaeuj lo.(caengz sat)