Ngoenzneix sou doxaeu,

Naeuz gingq gou gwn laeuj,

Sou caemh naengh roengzdaeuj,

Dingq gou naeuz geij coenz.

Gwn song sou cenj laeuj,

Gou naeuz sou goeng’yah,

Boux yawj boux dwg da,

Doxndiep gvaq ciuh vunz.

Gwn cenj laeuj daihngeih,

Naeuz sou ndeindei ngeix,

Boux yawj boux dwg’eiq,

Hwnjheiq cauh gyaranz.

Gwn cenj laeuj daihsam,

Naeuz sou amqamq dingq,

Doiq bohmeh hauqgingq,

Cingq rox guenj gyaranz.

Gwn cenj laeuj daihseiq,

Naeuz sou ndeindei siengj,

Goeng’yah dawz boux mbiengj,

Aeu lai siengj gyaranz.

Gwn cenj laeuj daihhaj,

Naeuz sou aj roxndeq,

Yaek baenz boh baenz meh,

Aeu roxndeq goq ranz.

Gwn cenj laeuj daihroek,

Coegrwz hix aeu rox,

Seiz baenz meh baenz boh,

Rox ndiep lwg cingq baenz.

Gwn cenj laeuj daihcaet,

Sou yaek caez dingqgangj,

Miz saeh aeu doxbang,

Cang mbouj raen mbouj baenz.

Gwn cenj laeuj daihbet,

Muengh gou mbouj beg naeuz,

Ndaej ngaenz yaek rox caeu,

Cij miz laeuj noh gwn.

Gwn cenj laeuj daihgouj,

Naeuz sou yaek aeu gaenx,

Hag gik couh mbouj baenz,

Gaenx gyaranz cij hoengh.

Gwn cenj laeuj daihcib,

Sou rox hix aeu dingq,

Song boux mbouj dingjgingq,

Rox doxgingq cij baenz.

Coenzcoenz doeng nai caez,

Rox ndaej deng mbouj deng,

Ngoenzcog son lwg’eng,

Mbouj deng caiq gaij gvaq.