2 nyied 17 hauh, Liujcouh Si Liujcwngz Yen banh fwenhoih, aeu coicaenh ndawbiengz fwen vwnzva doxgyau, fungfouq vunzlai ciengmoq vwnzva saedceij. Gyoengq canghfwen “Fwencuengh” caeuq cien boux doxhwnj bouxyawj daj Daibingz、 Majsanh、 Dunghcenz daengj yanghcin daeuj haenx doxcomz youq baksok hawfwen Dunghcenz Cin Duihoz Cunh doiq fwen, ciengq ok saedceij moq、 siengjmuengh moq swhgeij, gangj ok gij cingzngeih ndei swhgeij gyaez saedceij、 gyaez ranzmbanj, yinx ndaej le haujlai vunzlai daeuj dingq homx yawj. Ciuq cam rox, “Fwencuengh” dwg cungj fwen hingzsik gvangqlangh riuz youq dieg Bouxcuengh comz youq he, seizneix gaenq liedhaeuj Guengjsae Bouxcuengh Swcigih feihvuzciz vwnzva yizcanj mingzloeg, caemhcaiq ndaej swnjcienz caeuq hwngfat haemq ndei.

(Dwng Gwyi/邓克轶)