Veiz Gozcingh gig yawjnaek lajmbanj guh camhdienhraemx. De nyinhnaeuz, rengzraemx Guengjsae fungfouq, gak yienh、se guh suijli doengzseiz, vanzcienz ndaej giethab guh mbangj camhdienhraemx iq, gaijgez gij vwndiz dangdieg ciuqrongh caeuq gyagoeng nungzfucanjbinj yungh dienh. De baez daengz aen yienh, ceng mbouj lai cungj aeu cam gizhaenx hwnj le geij aen camhdienhraemx iq, gij yungzliengh canggihgi dwg geijlai, lij guh ndaej geijlai aen, baenzlawz gviveh, miz maz gannanz. De daegbied iugou gij dieg “sam sienq”, dangq guh camh- dienhraemx iq dwg hangh hongrap youqgaenj daeuj ca. Gwzveijvei Swcigih laebbaenz liux, de lai baez caeuq Cinz Gaihlu、Cai Yungjveiz doxyaeng, daezok gij yienh fanzdwg miz swhyenz rengzraemx, aeu youq geij bi ndawde ceiq noix guh baenz aen camhdienhraemx guzgan siujhingz geij cien cienvax doxhwnj he; doengz- seiz iugouz gij bumwnz cawjguenj dienhraemx swcigih, caenhvaiq cidingh gij cosih Guengjsae guh camhdienhraemx iq okdaeuj. De giengzdiuh, itdingh aeu genhgez hengzguh gij cwngcwz guekgya gvendaengz “ byawz guh、byawz guenj、byawz ndaej ndeicawq、couh hawj byawz”. Aenvih caijyungh le gij cwngcwz caeuq cosih “ yungh dienh daeuj ciengx dienh”, hawj gak gaep engqgya hwnjheiq banh dienh, Guengjsae youq mwh “4.5” camhdienhraemx mbefat ndaej gig vaiq, daengz bi 1975, gij yungzliengh canggihgi camhdienhraemx iq daengx gih ndaej 41.5 fanh cienvax, miz mbangj yienh lij mbefat baenz gij muengxdienh iq bonjfaenh.

Daihlig mbefat gij dienh youz rengz raemx fat doengzseiz, swcigih lij mbefat le mbangj cangjdienhfeiz.

Guengjsae baez daengz mwh raemxmbaet, gij dienh youh rengz raemx fat couh deng hanh gig haenq. Veiz Gozcingh cujcangh aeu guh di cangjdienhfeiz, de naeuz:“Gij cangjdienhfeiz hung couh yo youq gwnz bakgumz meizgvangq gizhaenx, mienxndaej deng daj dieggyae yinh meiz daeuj.”

Cangjdienhfeiz Hozsanh dwg aen daihhingz cangjdienh daih’it youq bakgumz yo , yungh gij meiz cizlieng yaez bonjdieg daeuj fatdienh, bi 1971 daih 1 daiz gihcuj hainduj douzcanj. Mwh diu ok Guengjsae seiz, aen cangj neix guhgvangq baenz 20.5 fanh cienvax.

(caengz sat)