Mboengqgonq, loq miz di hoengq, hwnj muengx bae yawj lundanz, youq gwnz lundanz yawjraen haujlai cwngqlwnh gvendaengz lauxsae. Gyoengq cwngqlwnh haenx, mizdi gangj daengz lauxsae sinhoj lai, mizdi gangj daengz lauxsae soeng lai, lijmiz vunz gangj daengz lauxsae seizneix baenzlawz baenzlawz la, mwngz coenz gou coenz, gangj ndaej gig sarwz.

Gou dwg boux lauxsae lajmbanj ndeu, ngoenznaengz cungj youq lajmbanj guh gij hong son saw, gangj daengz lauxsae lajmbanj, goulau cijmiz dou cungj vunz neix, cij miz swhgwz bingz aen cizyez lajmbanj lauxsae lo.

Vahsug gangj: Guh gijmaz rox gijmaz, gek hangz he couh lumj gek goengq bya ndeu. Gyoengq lauxsae lajmbanj dou, caen mbouj lumj mbangj vunz gangj yienghhaenx, hong soeng lai lo, baenzngoenz cij hwnj song sam dangz goq, gizyawz seizgan couh mbouj yungh guh gij saeh wnq lo; engq mbouj lumj mbangj vunz gangj yienghhaenx, gyoengq lauxsae seizneix simdoeg lai, doengh mbouj doengh couh fadceih hagseng, gij cizyez daudwz cungj vut caez lo.

Gangj dahraix, guh boux lauxsae lajmbanj saedcaih mbouj yungzheih bw! Lauxsae lajmbanj dwg lauxsae, yaek hawj hagseng son saw; lauxsae lajmbanj dwg canghyw, yaek hawj hagseng caz bingh; lauxsae lajmbanj dwg baujanh, yaek guenj hagseng ndei, baujcwng hagseng ancienz; laujsae lajmbanj dwg baujmuj, yaek liuhleix hagseng gwndaenj; lauxsae lajmbanj dwg canghdajcawj, yaek bang hagseng dajcawj gijgwn. Ei, cien coenz fanh gawq, gyoeb baenz gawq vah ndeu——seizneix guh boux lauxsae lajmbanj mbouj yungz- heih lo.

Gangjnaeuz lauxsae lajmbanj dwg canghyw, dwg aenvih lauxsae lajmbanj ngoenznaengz daengz hag- dangz, gienh saeh daih’it couhdwg bang hagseng rau ndangraeuj, neix dwg veiswngh bumwnz gvidingh aeu guh. Leixyouz dwg: Hagdangz vunz lai, dwg gizdieg yunghheih fat bingh. Danghnaeuz laeuh saek ngoenz mbouj bang hagseng rau ndangraeuj, dingjlingz miz saek boux hagseng ndangdaej fatndat, mbouj ndaej gibseiz soengq bae yw, caux baenz gij hougouj mbou ndei, byawz hix fucwz mbouj ndaej.

Gangjnaeuz lauxsae lajmbanj dwg baujanh, dwg aenvih lauxsae lajmbanj yaek gamguenj hagseng youq ndaw hagdangz ancienz. Danhfanz hagseng youq ndaw hagdangz fatseng gijmaz saehcingz, lumjnaeuz doxmoeb、doeklaemx、youq gwnz loh daeuj hagdangz caeuq baema ranz gojnwngz miz yungyiemj yawj mbouj raen haenx, cungj aeu lauxsae louzsim bae guenj. Danghnaeuz hagseng youq ndaw hagdangz roxnaeuz youq gwnz loh daeuj hagdangz、baema ranz fatseng gijmaz saehcingz, dou aeu aemqdawz gij cwzyin bw.

Gangjnaeuz lauxsae lajmbanj dwg baujmuj, dwg aenvih lauxsae lajmbanj aeu liuhleix hagseng ngoenznaengz youq ndaw hagdangz gwndaenj. Gyangngoenz yaek bang hagseng cawj haeux、bang hagseng faen haeux faen byaek、bang hagseng swiq vanj; gyanghaemh yaek buenx hagseng ninz, bang hagseng bu mbonq、hoemq moeg. Danghnaeuz dwg hagseng lij iq, mbouj rox saeg buh, dou lij yaek bang de saeg buhvaq dem.

Gangjnaeuz lauxsae lajmbanj dwg canghdajcawj, di he hix mbouj loek. Daj bi 2011 seizcou, guekgya doihengz hagseng yingzyangj gaijndei giva hwnj, lauxsae lajmbanj dou couh yaek bang hagseng dajcawj gijgwn. Guekgya hawj boux hagseng ngoenz bouj 3 maenz ngaenz daeuj gaijndei yingzyangj (seizneix ngoenz bouj gaenq hwnj daengz 4 maenz), iugouz 3 maenz ngaenz neix itdingh aeu bienqbaenz gijgwn, hawj hagseng gwn daengz ndaw dungx bae. Vihliux baujcwng guh ndaej daengz, lauxsae lajmbanj dou cij ndaej gag bae gwnz haw cawx haeux cawx byaek, youh gag haeuj ndaw ranzdajcawj, caenndang dajcawj haeux caeuq byaek hawj hagseng gwn. Seizneix, danghnaeuz mwngz haetromh bae ganj haw, couh yawjraen boux ganj haw ceiq caeux haenx itdingh dwg doih lauxsae lajmbanj dou. Aenvih dou yaek ganj caeux dajcawx, doeklaeng yaek dauqbae hwnjdangz hawj hagseng.

Lauxsae lajmbanj couhdwg yienghneix, ngoenz bae ngoenz daeuj, souj youq ndaw hagdangz lajmbanj, gyoengqdou lumj aen loekci nei, baenzngoenz baenqlulu, mbouj caengz dingz saek di gvaq. Yienznaeuz gyoengqdou sinhoj, hoeng, gyoengq- dou coengzlaiz mbouj ienqhoij gvaq. Gyoengqdou couh lumj bouxvadruz, soengq buek youh buek hagseng daj dah baihneix daengz dah baihhaenx, ndwenngoenz cugciemh nyumx byoem dou hau caez. Danhnyienh, gwnz- biengz gyoengqvunz lai, mbouj dwg bouxboux cungj guh lauxsae, ndigah gyoengqvunz mbouj rox lauxsae miz geijlai baeg. Gyoengq lauxsae laj- mbanj dou engqgya sinhoj, aenvih dou cawz le son saw, lij guh haujlai hong caeuq son saw mbouj miz saek di gvanhaeh haenx. Maqmuengh aen sevei raeuz, bouxboux cungj yaek gingq lauxsae, engqgya gingqgyaez gyoengq lauxsae lajmbanj dou.