Gij haeuxsan bingzseiz raeuz aeu daeuj cawj haenx heuhguh haeuxsuen. Gaijfangginh 309 Yihyen yingzyangjgoh yingzyangjswh Coj Siujyaz gaisau naeuz, haeuxsuen hamz miz denfwnj、danbwzciz、youzlauz、veizswnghsu、yenhsonh、gai、diet daengj yingzyangj cwngzfwn ndang vunz aeu miz haenx, ndaej hawj aenndang vunzraeuz demlai yingzyangj caeuq ndat. Doengzseiz, haeuxsuen ndaej cangq beizheiq、bouj heiq ndaw、ciengx yaem seng raemx、cawz simfanz gaij hozhawq、nyinh saej dingz siq, hab boux beizheiq hawnyieg、simfanz hozhawq、yingzyangj mbouj ndei caeuq boux ngamq bingh ndei haenx gwn. Yungh haeuxsuen cawj cuk gwn ndaej ciengx ndang souhgyaeu, caengz bwx de ndaej bouj raemx dem cing, bouxbingh、mehsenglwg caeuq bouxlaux ceiq hab gwn cungj cuk neix. Mboujgvaq, boux baenz binghnyouhdangz mbouj hab gwn cuk haeuxsuen.