Dungxraeng: Aeu 4 liengx naenghenj dawgaeq cauj henj le ngenz mienz, yaek gwn haeux seiz yungh raemx begdangz heuz gwn, ngoenz 2 baez, moix baez 2 cienz (daih’iek byongh beuzgeng), lwgnyez gemj buenq, gwn fuk ndeu couh ndei, danhseih geih gwn saenaz.

Aek mwnh ciengq heiq: Aeu 5 cienz faen lauxbaeg baek vanj raemx ndeu gwn, ngoenz gwn 3 baez, lienz gwn 3 ngoenz couh ndei.

Sinzgingh hawnyieg: Aeu liengx ukmou ndeu, heuz beuzgeng dangzrwi he naengj cug gwn, ngoenz baez, lienz gwn 5 daengz 10 ngoenz.

Lwedhaw: Gaj gaeq gaj bit seiz, aeu mbaw ceij seuq ndeu dangj aeu lwed de dak sauj nu baenz mwnh, aeu laeujmakit heuz gwn, moix baez byongh beuzgeng, ngoenz 2 baez, lienz gwn byongh ndwen, geih gwn haijdai.

Ndaw ndat bak sauj: Aeu ragngox、duhheu gak 5 cienz, dwk vanj raemx ndeu cawj goenj le gya habliengh dangznae, cawz ragngox gwn duhheu caeuq dang, ngoenz 2 baez, lienz gwn 3 ngoenz, ndaej seng raemx nyinh bwt, gyangq huj siu ndat.

Menhsingq ganhyenz: Moix baez aeu 2 liengx raghaz hau, baek vanj raemx ndeu gwn, ngoenz gwn 3 baez, lienz gwn buenq ndwen, geih gwn huqmanh.

Mbei、mak、sainyouh gietsig: Aeu dawgaeq、mumh haeuxyangz gak 50 gwz, baek vanj raemx ndeu baez dog gwn liux, ngoenz gwn 2 daengz 3 baez, lienz gwn 10 ngoenz. Geih gwn bwtdaep doihduz、nohbiz caeuq hakgyaeq.