Ranz gou miz aen den- binghsiengh ndeu, aen denbingh- siengh neix dwg gou caet bi seiz cawx ma, daengz seizneix gaenq ndaej sam bi lo.

Aen denbinghsiengh neix gwnz dingj miz aen bingzdaiz ndeu, ndaej cuengq doxgaiq, aen bingzdaiz seiqhenz miz veizlanz, yienghneix doxgaiq couh mbouj yungzheih doek okdaeuj lo. Youq cingqmienh denbinghsiengh, miz aen baiz ndeu, baihgwnz sij miz cihmeh “Haier”. Youq aenbaiz baihgvaz diep miz mbaw biuj yungh dienh ndeu. Mbawbiuj baihgwnz miz mbaw doz song boux lwgsai iq ndeu, miz lwg ndeu dawz fwngz dap youq gwnz mbaq lingh lwg bae, lumj naeuz:“Aen denbinghsiengh neix caen ndei ha.” Lingh lwg ndeu ndaw fwngz gaem aen giuzsiet ndeu, lumj naeuz:“Giuzsiet youq ndaw den- binghsiengh mbouj lau yungz bw!”

Denbinghsiengh ranz gou miz song caengz, caengz gwnz dwg cuengq gij gwn haemqvaiq gwn haenx. Caengz gwnz baihndaw miz seiq gyaeg. Gyaeg laj dwg aen hab ndeu, ndaej yungh fwngz rag okdaeuj, lingh sam gyaeg ndaej diuz sangdaemq dohcaep. Aendou caengz gwnz baihndaw hix miz sam gyaeg, ndaej cuengq gyaeqgaeq、doenghgij bingz haemq sang haenx daengj. Caengz laj dwg caengz cuengq gijgwn cuengq haemq nanz haenx caeuq cuengq sietdiuz、binghgizlinz daengj. Baihndaw miz sam gyaeg, moix gyaeg cungj dwg aen hab ndeu, yaek cuengq doxgaiq caeuq aeu doxgaiq couh rag okdaeuj.

Denbinghsiengh ranz gou lij ndaej diuz dohcaep, ceiqlai ndaej diuz haj dangj, seizhah ndaej diuz dohcaep daemq di, seizdoeng ndaej diuz dohcaep sang di.

Neix couhdwg denbinghsiengh ranz gou. De dwg bangfwngz ndei ranz gou!(指导老师 覃红梅)