Haeuj laebdoeng le faex nywj reuqroz lo, cien non fanh roeg cungj ninzdoeng, heiqyiengz bouxvunz caem youq, heiqyaem hoengh- vuengh, baenzneix, gij lwgnyez bingh lai ndang nyieg haenx wnggai baenzlawz gwn bouj ne?

1、Cawjranz gaej laepda hawj lwgnyez gwn bouj. Itbuen daeuj gangj, cawjranz mbouj daiq rox gij cihsiz gwn bouj, roxnaeuz ngamq rox di ndeu, dingq bouxwnq gaisau le, roxnaeuz luenh saenq meizdij gvangjgau luenh gangj, couh bae cawx baujgen sizbinj、yingzyangj doxgaiq caeuq gij yw hamz miz veizswnghsu gvangvuzciz daeuj hawj lwgnyez gwn bouj, doeklaeng cij hawj bohmeh saetmuengh ndwi, mbangj lij miz fucozyung dem. Mbangj huqbouj lumj funghvangzcangh hamz miz itdingh soqliengh gizsu, lwgnyez gwn le baenz singq caeux cug. Mbangj yingzyangj baujgenbinj hamz miz yingzyangj doxgaiq daiq lai roxnaeuz dengdoeg, lumj veizswnghsu A caeuq veizswnghsu D dengdoeg daengj. Faensik gij yenzyinh neix, cujyau dwg cawjranz caengz loengh cingcuj ndaw ndang lwgnyez dauqdaej dwg siuj gijmaz couh luenh bae cawx ma hawj lwgnyez gwn, wnggai bae hawj canghyw duenq ndei cingcuj le dingq canghyw bae cawx ma gwn bouj.

2、Itbuen cingzgvang lajde, gij yingzyangj lwgnyez bingq mbouj sihyau doenggvaq ywbouj daeuj gwn bouj, ngoenz sam donq gya diemjsim couh gaeuq lo, cawjranz aeu roengzrengz anbaiz ndei gijgwn lwgnyez doxdaengh, lwgnyez miz mbouj ndei sibgvenq aeu gibseiz gaijcingq gvaqdaeuj.

3、Hawj lwgnyez gwn bouj seiz, lij aeu doiq lwgnyez gojnwngz miz binghmenhsingq roxnaeuz bingh- gipsingq miz cimdoiq dwk bae ceihyw, yienghneix yaugoj cij ndei hane.