Rangh dieg neix dwg diegndoi. Daj gizgyae muengh，ndoi rangh ndoi bya dieb bya. Daj gizgyawj yawj, bya sang ndoi lingq, faex mwn ndoeng nyaengq. Youq ndaw ndoi miz aen suijgu hunghaeng ndeu, raemx sawdikdik, nazreih rog ndoi couhdwg baenh aen suijgu neix dwkraemx.

Boux guenjleix aen suijgu neix dwg boux goenglaux ndeu, de boux dog youq ndaw aenranz henz suijgu youq.

Gaxgonq, daxgoeng ngoenz- naengz ndaejhoengq, couh bae benz ndoi dwknyaen youz ndoi guhcaemz. Seizneix de youq gwnz ndoi youq, de naengh ndaw ranz couh dingqnyi roeg heuh cica, yamq ok dou couh yawjraen va hai hoenghhwd, baenzlawz lij yungh cienmonz bae youz ndoi guhcaemz ne. Ndigah de couh ciengzciengz epbya, gig noix bae dwknyaen lo.

Daxgoeng yied daeuj yied rox epbya lo. Yienghneix, ngoenznaengz ciengz ep ndaej bya lai, gwn mbouj liux couh ciengx youq ndaw aen gang hung ndeu. Aen gang neix couh cuengq youq ndaw ranzcauq genjdanh dap baenz haenx.

Seizneix cingq ngamq haeuj seizhah, haemh ndeu, de lij caengz ninz, couh dingqnyi ndaw ranzcauq miz gijmaz yiengj, de couh vax dawz dienhdoengz, gaem diuz faexgyaengh ndeu bae yawj. Yienzlaiz dwg duz nyaenma ndeu daeuj caeg bya gwn, mbouj haeujsim doek ndaw gang hung bae, baenzlawz hix benz mbouj ndaej hwnjdaeuj. Daxgoeng siengj daengz gaxgonq geij baez mbouj rox gijmaz yienzaen bya couh noix lo, de couh miz di hozndat, siengj moeb duz nyaenma dwghaemz youh boihseiz neix dai bae. Hoeng, caj de yungh dienhdoengz ronghsagsag ciuq duz nyaenma neix, yaengx faexgyaengh yaek moeb roengzbae seiz, de yawjraen ndaw da nyaenma cungj dwg saetvueng laudai, lij miz raemxda gvaengx dwk, de sim unq lo…… Doeklaeng, de cuengq duz nyaenma deuz lo. Gvaqlaeng, gij bya ndaw gang hung de caiq hix mbouj noix gvaq lo.

Yaepda couh daengz seizcou, miz haet ndeu, mbwn lij laepcupcup, daxgoeng lij ninzndaek gyaenfofo. Sawqmwh, miz duz lawz youq rog nyauj bakdou yiengjgyatgyat, nyauj ndaej gig gaenjgip, lij doq nyauj doq swenjngo’ngo. Daxgoeng ndiu lo, couh hwnqcongz daeuj hai dou yawj.

Bakdou baez dajhai, duz nyaenma ndeu cingq gaenjgip saetvueng dwk ngiengx naj muengh de. Daxgoeng baez yawj, laxlawz dwg duz nyaenma baezgonq de cuengq haenx. Duz nyaenma haenx youh youq gizhaenx cienq gien buet le gien youh gien, couh lumj bouxngoemx miz saehcingz gaenjgip youh gangj mbouj ndaej vah okdaeuj nei. Daxgoeng yawj le, ndawsim naemj: “Lauheiq dwg nyaenma ra mbouj ndaej gwn, iek lai, daeuj gouz aeu gwn ba.” Yienghneix daxgoeng couh cienq ndang bae ranzcauq, siengj dawz duzbya daeuj hawj nyaenma gwn. Couh youq seizneix, nyaenma fwt cung hwnjbae, gamz dawz gavaq daxgoeng, haenq- rengz rag daxgoeng ok dou. Daxgoeng hwk ndaej doeksaetyat, sawqmwh gamjdaengz miz gijmaz saeh, couh gaen nyaenma daeujdaengz gyang- hongh. Cingq youq seizneix, deih- doengh lo, aenranz daxgoeng youq haenx sikhaek gunglung lak roengz- daeuj.

Daxgoeng ngaez lo. Caj de singj dauq, nyaenma caeux mbouj rox buet bae gizlawz lo. De nyaenx mbouj ndaej danq naeuz: “Duz nyaenma neix caen lingzleih ha, couh lumj bouxvunz nei doengsaeh simndei!”

Daxgoeng ngeix mbouj daengz de cuengq nyaenma deuz, nyaenma gingqyienz rox dauqma gouq de, de doiq daihgya naeuz:“Digiuz dwg aen ranz hung ndeu, doenghduz dwg baengzyoux bouxvunz, gyoengqde yienznaeuz mbouj rox gangjvah, hoeng, hix lumj vunz nei rox ngeix、lingzleih、simndei……” Daj seizhaenx hwnj de mbouj caiq dwknyaen, hix mbouj caiq epbya lo.

(Ganh Sozvwnz/甘说文)