Miz aen cangj gaucatheuj ndeu, canjbinj cizlieng gig ndei, baucang ndeiyawj, gyoengqvunz cibfaen maij bae cawx gij huq neix. Ngaenz gaihuq aen cangj neix laebdaep 10 bi demgya. Hoeng, daengz daihcib’it bi, gai mbouj ndaej baenzlai ngaenz lo, doeklaeng 2 bi hix dwg baenzneix. Gunghswh gyoengq ginghlij haihoih doxyaeng baenzlawz guh gai ndaej ngaenz lai di. Youq ndaw hoih, bouxcungjcaiz gunghswh naeuz:“Byawz siengj ndaej aen banhfap okdaeuj gaijgez gij vwndiz neix, gou couh dajciengj 10 fanh maenz ngaenz hawj de.” Boux ginghlij mbauq he ndwn hwnjdaeuj, ndenq mbaw ceij ndeu hawj bouxcungjcaiz, bouxcungjcaiz neix yawj liux, doq ciem mbaw feiceingaenz miz 10 fanh maenz ngaenz ndeu hawj boux ginghlij neix. Gwnz mbawceij sij miz: Dawz aenbak gaucatheuj seizneix hai hung hauzmij ndeu. Bouxvunz ngoenznaengz gyanghaet nyaenj gaucatheuj raez doxdoengz, hoeng, aenbak mbe’gvangq hauzmij ndeu, boux vunz he couh lai yungh gaucatheuj hauzmij ndeu gvangq, yienghneix ngoenz ndeu yaek yungh bae gaucatheuj geijlai ne! Doeklaeng, gunghswh neix cungj vuenh gij baucang gaucatheuj bae. Daengz daihcibseiq bi, gunghswh neix couh youh gai ndaej haujlai ngaenz dauq moq lo.