Gaenh geij bi neix daeuj, Lungzswng Gak Cuz Swciyen “aenmbanj miz daegsaek” —Mbanj Bwzmen Hungzyauz yawjnaek baujhoh mbanj gaeuq、 ranz gaeuq, caemhcaiq baengh Bwzmen aenmbanj gaeuqgeq、 saujsu minzcuz vwnzva fungfouq caeuq swhyienz nungzyez gingjsaek swhyenz daengj, hengzguh hanghmoeg daiq- doengh、 seizseiq ragdoengh cauxguh cwzloz, caenh’itbouh doed ok daeg- saek, guh ndei fugsaeh, gyahung binjbaiz, hawj Bwzmen Yauzcai byaij yiengq aenmbanj minzcuz yienghmoq, baenz “mbanj okmingz lijyouz” gig miz daegsaek minzcuz.

Mbanj Bwzmen Hungzyauz dwg aen mbanj Hungzyauz gaeuqgeq caeuq yienhda he. Ndigah dajcaux aeu minzcuz minzsuz fungcingz lijyouz guhcawj, guh hung daegsaek canjnieb caeuq hwngfat canjnieb ngamqhwng. Aeu Hungzyauz minzcuz fungcingz lijyouz hwngfat guh muzbyauh, haenq- rengz cingjceih swnghdai vanzging caeuq swnghhoz vanzging aenmbanj, gyagiengz lijyouz gyaudoeng、 ancienz baujcang wngqgip ceihleix、 lijyouz ciepdaih daengj giekdaej sezsih hwnjguh.

Mboengqneix, lij doenggvaq dieg- namh riuzcienj fuengsik, yinxhaeuj Hungzvwnz Swnghdai Nungz Linz Gohgi Mouyi Gunghswh, aeu aen mbanj ca mbouj geijlai 100 moux diegnamh caebcomz riuzcienj haifat, ndaem vagut、vagwzsangh caeuq vayouzcai daengj, daezsang gyaciz ngonzyawj nazmbaeklae Bwzmen; leih- yungh gijndei cungcuk goekraemx vat daemzbya, laeb dieg hekyouz epbya; aeu aenmbanj gij doxgaiq reihnaz dajcaux baenz doxgaiq lijyouz miz daegsaek minzcuz deihfueng. Neix doidoengh le Lungzswng “minzmou giyez” ginghci hwngfat, engqgya mizleih dajcaux doxgaiq miz daegsaek minzcuz Lungzswng, gya’gvangq gij mingzdaeuz ndei Bwzmen Yauzcai caeuq swnghcanjliz “minzmou giyez”.

Linghvaih, Lungzswng cingjhab cienz gungh 1000 lai fanh maenz. Bued roengz gya’gvangq roenloh haeuj mbanj、 baujhoh nem gaijndei daegsaek ranz gaeuq caeuq lijyouz giekdaej sezsih daengj hanghmoeg hwnjguh. Guhsat le aen doumbanj、hekyouz cungsim、 Hungzyauz bozvuzgvanj daengj 21 aen hwnjguh hanghmoeg.

Lungzswng cungfaen vatcimh caemhcaiq cingjhab Mbanj Bwzmen Hungzyauz, Daj “aenmbanj miz daegsaek” yiengq “aenmbanj lijyouz daegsaek okmingz” dajcaux, gaenq hainduj yienh’ok gveihmoz, mboengq- neix gonqlaeng ndaej “Cungguek buek daih’it aenmbanj saujsu minzcuz miz daegsaek” “Guengjsae aenmbanj lijyouz daegsaek okmingz” “Guengjsae AAA gingjgih” daengj cwngheuh ndei.

(Suz Linzdingz/粟琳婷)