Couh Gvanghcunh gig rox guh ginghci, gaijfang le guh gvaq boux bucangj Caizcwngzbu Veijyenzvei Ginhcwng Vazdungh、boux fucujyin Daihseiq Ranzbanhgoeng Gozvuyen、boux fucujyin Ginghveij Guekgya. 60 nienzdaih co diuhnyaemh boux cangzveij Cunghnanzgiz Cunghgung Cunghyangh giem boux cujyin giveij, vih Guengjsae guh hong ginghci bang gvaq haujlai saeh. Cunghnanzgiz siu bae le, Veiz Gozcingh cingjgouz diuh de daeuj Guengjsae guh hong, hawj de guh boux fucujcangj Cujcijveih Swnghcanj Gwzveijvei Swcigih gonq, doeklaeng guh gvaq boux cujyin giveij、boux fucujyin Gwzveijvei Swcigih、boux fucujsiz Swcigih、boux suhgi Dangjveij Swcigih.

Couh Gvanghcunh bi 1972 nienz co daeuj daengz Guengjsae seiz, miz duenh ndeu, Veiz Gozcingh ceng mbouj lai buenq ndwen couh ra de lwnh gij vwndiz gvendaengz ginghci Guengjsae baez ndeu. Doiq hwnjguh ginghci nyienh ngeixcon, yiengq lajfwngz hagsib mbouj lau najmong, dwg gij daidu Veiz Gozcingh daj bingdoih senj daengz diegfueng guh hong soqlaiz miz haenx. De ciengzseiz yiengq Couh Gvanggcunh cam gijneix gijhaenx, lumjnaeuz: Yizbwnj guh cangj gangdiet hung vihmaz genj youq henz haij, gijmaz dwg gij doxca nengz lueg dienhlig daengjdaengj. De gig yawjnaek gij yigen Couh Gvanghcunh, vanzlij gyau gij hong cungdenj nanzdenj swnghcanj gensez hawj Couh Gvanghcunh bae guh. Dang Liuj- gangh gya’gvangq cingq guh daengz giz gvanhgen seiz, de heuh Couh Gvanghcunh bae bang Liujgangh; dang dienhraemx Guengjsae gensez mienhdoiq gij vwndiz baenzlawz haifat seiz, de youh heuh Couh Gvanghcunh daiqdaeuz bae guh gij gviveh cunghab leihyungh Dahraemx- hoengz.

Aen cujiq gviveh dazyinx neix laebbaenz gaxgonq, bumwnz gyau- doeng caeuq bumwnz dienhraemx gaenq faenbied daj hangzyinh caeuq fatdienh song baih neix guh gvaq gviveh. Baez gviveh neix cujyau vihliux hezdiuz gij yigen hangzyinh caeuq fatdienh, led gij hanghmoeg geizgyawj yaek haifat haenx daeuj guh. Aen Ranzbanhgoeng Cujiq Dazyinx gvangqlangh soucomz caeuq cungfaen leihyungh gij caizliuh banlaux rom roengzdaeuj, damqra gij ndei caeuq gij yaez ndaw fueng’anq gaxgonq geij baez haifat gaepmbaek, miz cimdoiq dwk bae yienhciengz cungdenj guh cazyawj caeuq cunzcam lengqboux, caemhcaiq doiq gij fueng- anq yaek daujlun guh ngeixyaeng ciendaez. 1973 ndwen 9, gyoengq- de daezok le song giz dieghaifat geizgyawj hawj dangjveij swcigih, giz he dwg Dava, giz he dwg Dadwngzyaz. Gangj daengz hangzyinh ne, dandog gag guh gaepmbaek mbouj ndei, ndaej giethab gaepmbaek dienhraemx bae haifat mieng roen- ruz.

(caengz sat)