Bouxvunz lau nit dwg aenvih caeuq ndang vunz sup haeuj mbangj gvangvuzciz noix mizgven. Lumj gai youq ndaw ndang vunz lainoix ndaej cigciep yingjyangj daengz aensim、sailwed caeuq noh hoetsuk caeuq fatangq; ndaw lwed noix diet couh yinxhwnj baenz noix diet lwedhaw, ciengz biujyienh dwg ndaw ndang siuj ndat、ndangraeuj daemq daengj yienghsiengq.

Ndigah, bouj gwn gijgwn hamz gai caeuq diet lai he ndaej hawj aenndang lai dingj nit. Gyoengq gohyozgyah fatyienh, moix 100 gwz haijdai hamz miz 1177 hauzgwz gai, 150 hauzgwz diet. Vihneix, haijdai doiq lwgnyez caeuq bouxlaux、mehmbwk baujgen miz cozyung youqgaenj.

Haijdai hamz denj lai, denj ndaej coi gyazcang sensu iemqok, doengzseiz ndaej canjseng ndat. Ndaw gij raemx gyazcang sensu ndang vunz iemqok haenx miz cungj huq ndeu heuhguh gyazcang sensu, ndaej gyavaiq haujlai cujciz sibauh ndaw ndang yangjva, hawj aenndang lai canj ndat okdaeuj, lwed naengnoh lae vaiq, yienghneix couh ndaej dingj nit dingj gyoet lo. Itbuen vunzhung aeu miz veizlieng yenzsu——denj dwg 150 veizgwz baedauq, 100 gwz haijdai ndawde couh hamz miz 240 hauzgwz denj lo.