Seizdoeng ciengz fatseng sim sailwed baenzbingh, lumj simsaek daengj.

Doengh cungj vunz lawz yungzheih ndaej cungj bingh neix ne? Cujyau dwg bouxcungnienz、bouxlaux、vunz ndawsingz gwn gij huq youznywnx lai yindung noix haenx.

Fap fuengzceih:

(1) Haeujsim bauj raeuj, habdangq yindung. Boux simdaeuz mbouj ndei ceiq ndei caj daengngoenz okdaeuj caiq okbae yindung, ceiq ndei dwg youzbyaij、menhbuet、dwk daigizgenz daengj yindung mbouj daiq haenq haenx.

(2) Habdangq gwn bouj. Haujlai vunz miz aen sibgvenq youq seizdoeng gwn bouj he, danhseih aenvih seizdoeng yindung noix, danghnaeuz daihliengh gwn bouj gijgwn ndat, dauqfanj yinxhwnj hezcij swng sang, miz gojnwngz rox fatseng sim sailwed loeklak.

(3) Menhmenh gaiq ien. Yenhgenj ndaw ien rox hawj vunz sim diuq gyavaiq, hezyaz swng sang, aensim hauq yangjgi lai, ndoet laeuj gvaqbouh rox hawj rengz aensim sousuk doekdaemq. Ndigah, boux sim sailwed miz bingh aeu yiemzgek gaiq ien gimq laeuj, fuengz demgya simdaeuz fudanh yinxhwnj simlwd saetciengz, daengzlaeng baenz doenghmeg giet ndongj.

(4) Lai gwn gijgwn baujhoh sim sailwed he. Lumj cijvaiz、nohbya、byaekginzcai、haeuxyangz daengj.

(5) Dinghgeiz genjcaz. Boux sim sailwed miz bingh aeu ciuqseiz gwn yw, mbouj ndaej raemhrwnh gemj yw roxnaeuz dingz yw.