Dangqnaj, Namzningz Si gveij- dau gyaudoeng 1、2、3 hauhsienq Sawgun camhmingz, Namzningz Si Cwngfuj gaenq baefuk. 1 nyied 18 hauh, ciuq Namzningz Si Minzyijveij iugouz, Swcigih Minzyijveij ciuhai hoihsaemjdingh Namzningz Si gveij- dau gyaudoeng 1、2、3 hauhsienq camhmingz Sawcuengh fanhoiz. Swcigih Minzyijveij fucujyin Vangz Cenzcungh cujciz haihoih, de yiengq gyoengq lauxhangz daeuj haihoih haenx lwnh gij cingsaenz “Aen Hoih 2016 Nienz Daengx Gih Hong Minzcuz Yijvwnz Hidungj”. Swcigih Minzyijveij Minzcuz Yijvwnz Gunghcoz Lauxhangz Swhsinz Veijyenvei mizgven lauxhangz、Gvangjsih Sawcuengh Hagdangz、Gvangjsih Mingzcuz Bause、Gvangjsih Sam Nyied Sam Cazcise、Gvangjsih Minzcuz Cuzbanjse caeuq Swcigih、 Nanzningz Si Minzyijveij daengj yaek 20 vunz camgya haihoih.

Gyoengq lauxhangz daeuj cam- gya haihoih haenx, doiq 2015 nienzdaej Swcigih Minzyijveij cujciz ciuhai “Hoihbingzsaemj Namzningz Deihdiet Geiqhauh Dazyinx Saw- cuengh fanhoiz” saemjdingh 1 hauhsienq le, miz mbangj Sawgun camhmingz lij miz bienqdoengh, Sawcuengh fanhoiz hix aeu riengz guh saemjdingh. Doengzseiz, doiq 2、3 hauhsienq camhmingz Sawcuengh fanhoiz guh saemjdingh.

Ginggvaq gwnz hoih gyoengq lauxhangz doxcwngq doxyaeng, ndaej ok bingzsaemj yawjfap: It dwg fanhoiz doengyungh cwngheuh camhmingz seiz, caenhliengh yungh sawloih minzcuz、sawloih lauxciq, lumjbaenz: “站” “大道” “路” faenbied fanhoiz baenz “camh” “daihloh” “roen”；“东路” “西路” “南路” “北路” “中路” faenbied fanhoiz baenz “roen doeng” “roen sae” “roen namz” “roen baek” “roen gyang”. Ngeih dwg cienmonz cwngheuh camhmingz cujyau ciuqei《Aenbiuj Swzciq Sawgun Moq Yijyinh Cienjsij》hengzguh yaem- hoiz. Sam dwg cihmeh Sawcuengh ndaej cienzbouh daihsij roxnaeuz moix aen swz daih’it cih cihmeh daihsij, gizyawz cihmeh siujsij. Seiq dwg gij hingzsik vangsij Sawcuengh baiz youq baihgwnz Sawgun; gij hingzsik daengjsij Sawcuengh baiz youq baihgvaz Sawgun, cihmeh Sawcuengh ndaej yungh gij sikyiengh swnhcimcung cienq 90°baizbanj daeuj sij.

Gij guhfap cawqleix gveijdau gyaudoeng 1、2、3 hauhsienq camhmingz Sawcuengh fanhoiz neix, baezlaeng youq hengzguh hong Sawcuengh fanhoiz roenmingz、camhmingz、geiqhauh dazyinx caeuq byauhyij ndawde ndaej ciuqei.

（Luz Yaujli)