Miz aen mbanj iq ndeu youq ndaw luegbya, aenmbanj lumj suenva yienghneix gyaeundei: Seizcin dujva haihoengh, seizhah gofaex heuyau, seizcou lwgmak homfwd, seizdoeng vameiz hausag. Aensim vunzmbanj hix lumj suenva nei gyaeundei.

Aen mbanj neix miz dax buz Bouxcuengh ndeu, singq Mauz. Mauz daxbuz gaenq 80 lai bi lo, de cijmiz dahlwg ndeu, hoeng, dahlwg youq Guengjdoeng guhhong haq vunz lo. Mauz daxbuz couh boux dog gvaq saedceij.

Ndaw mbanj miz ranz Bouxgun ndeu, bohmeh simsienh, miz dah lwg ndeu heuh Lanzlanz. Lanzlanz gig saundei, doiq da youh hung youh ndongq, vunz gig coengmingz dwggyaez. Daxmeh Lanzlanz ciengz- seiz daiq Lanzlanz bae yawj Mauz daxbuz, miz seiz bang dajsaeg, miz seiz bang nyib buh, miz seiz lij daiq di ndei gwn bae hawj Mauz daxbuz. Daxmeh ciengzciengz doiq Lanzlanz naeuz:“Lanzlanz, Mauz daxbuz boux dog gag youq, gig godog, mwngz gaenq cib lai bi lo, baezlaeng ndaejhoengq couh lailai bae buenx Mauz daxbuz, bang de guh di hong mwngz guh ndaej daengz haenx.” Lanzlanz roxsoq dwk ngaekngaek gyaeuj.

Ngoenzneix dwg singhgiz roek, Lanzlanz bae ranz Mauz daxbuz, yawjraen denzdemh caeuq buhvaq cuengq ndaw ndij caengz saeg, couh laeglemx aemq aen ndij, gaem aen buenz, bae henz dah dajsaeg lo.

Mbouj geij nanz, Mauz daxbuz dawz dwngx daj ndaw rug byaij okdaeuj, yawjraen denzdemh caeuq buhvaq saeg seuq dak ndei, gokda dumz lo, de menhmenh byaij gvaqbae, dawz Lanzlanz got haeuj rungj, daxbux angq dwk naeuz:“Dah lwgnyez sim- ndei lai lo, mwngz caeuq daxmeh mwngz cungj dwg yienghneix bang gou, gou mbouj rox baenzlawz docih mwngz ha!” Lanzlanz dingq le, lienz- muengz naeuz:“Mbouj yungh docih law! Gou dwg boux sausenhduiyenz, bang bouxlaux guh di saehcingz dwg wnggai. ”

Neix caen dwg ndawbiengz gag miz caencingz youq ha! Muengh raeuz lumj Lanzlanz caeuq daxmeh de nei, lailai bae bang boux vunz yaek aeu raeuz bang haenx.

（指导老师：覃珍团）